310. De sancto Thoma.

1 a. Gaude, fides christiana,
Thomas tuus hodierna
Luce prodit caelitus,

1b. Qui multum tibi profuit,
Dum sic tangendo credidit
Instructus divinitus.

2 a. Hic a Christo iam electus
Dignus plane est effectus
Coetu apostolico,

2b. Christi flagrat sic amore,
Ut mori cum salvatore
Exoptet mirifico.

3 a. O quam ardens, quam devotus,
Quam divino fervens totus
Spiritu constiterat,

3b. Quando Christus, fons amoris,
Vulnus divini pectoris
Tangi sic praestiterat.

4 a. Hinc ad Indos profecturus
Dei verbo fit securus
De palma victoriae;

4 b. Morbos fugat sancta prece,
Spiritali pressam nece
Gentem levat Indiae.

5 a. Dum sic Thomas elaborat
Plebem suum et exornat
Omnibus virtutibus,

5 b. Surgit Satan in doctorem
Excitatis in pastorem
Multis infidelibus.

6 a. Fremunt impii ut ferae,
Innocentem tradidere
Fornacis incendio ;

6 b. Sed magister veritatis
Virum tantae pietatis
Salvat a supplicio.

7 a. Sic multorum iam salute
Procurata cum virtute
Caelo scandis, vir inclute,
Coronatus gladio.

7b. Pie doctor optime,
Thoma, tuo precamine
Caelesti dona lumine
Nos frui cum gaudio.