319. De sancto Verano.

1 a. Gaude, praesul ter beate,
A primaeva qui aetate
Totus Deo deditus

1b. Candida virginitate
Insignique pietate
Es ornatus caelitus.

2 a. Gaude, ver plenum decore,
Miro redolens odore,
Germinans ut lilium,

2 b. Florens quasi vernans rosa
Violaque generosa
Hortorum caelestium.

3 a. Gaude, fidei zelator,

Veritatis propagator,

Sanctitatis regula,

3 b. Verbo docens et exemplo,
Effulgens in Dei templo
Velut ardens facula.

4 a. Gaude, qui vincens per crucem
Fugansque draconem trucem
Populum laetificas,

4b. Signorum namque splendore,
Virtutum clarus fulgore,
Semper ut sol emicas.

5 a. Gaude, pastorali cura
Praestans et via secura
Plebem ducens creditam

5b. Ad domum aeternitatas
Veraeque felicitatis
Per virtutum semitam.

6 a. Gaude, qui beata sorte
Vitam pretiosa morte
Claudis cum victoria;

6b. Caelos petis laureatus
Et a Christo es vocatus
Ad caelorum praemia.

7 a. Gaude, qui iam coronatus
In caelis hic operatus
Tamen es magnalia,

7 b. Sicco parans pede viam,
Quando ducis plebem piam
Amnium per invia.

8 a. Pater flagrans caritate,
Sublimis humilitate,
Virtutum sacrarium,

8 b. Sacra benedictione
Dona et protectione
Hoc tuum coenobium.

9 a. Urbem hanc Avenionem
Tuamque Cabilionem
Serva potentissime,

9 b. Donans copiam bonorum,
Sed praesertim supernorum,
Patrone sanctissime.