322. De sancto Vincentio.

1 a. Deponentes omne maestum
Celebremus diem festum
Beati Vincentii,

1b. Miles regis sempiterni
Nobis exstat hodierni
Causa recens gaudii.

2 a. Hac in die de profano,
De crudeli Daciano
Adeptus victoriam,

2 b. Dum deponit carnis molem,
Ad videndum veram solem
Intrat caeli curiam.

3 a. Caelum intrans angelorum
Laetiorem reddit chorum
Odoris fraglantia,

3 b. Ad odoris novitatem
Virtutumque venustatem
Tota stupet curia.

4 a. Bona calcans huius vitae
Gloriosi mens levitae
Futura praesentibus

4 b. Antetulit nec tormentis
Cessit hostis saevientis
Multis et atrocibus.

5 a. Namque fame maceratur,
Ferro, flagris laceratur,
Est adustus faculis,

5 b. Est a gente bestiali
Loco clausus carcerali
Superiectus testulis.

6 a. Ubi descendentibus
Supernis spiritibus
Lux ingens apparuit,

6 b. Quae locum illuminans
Et noctem eliminans
Custodes perterruit.

7 a. Testarum asperitas
Fit florum suavitas,
Vernat carcer floribus,

7 b. Non carcer, sed camera
Dulcis, odorifera,
Digna caeli civibus.

8 a. Ad tyrannum properant,
Narrant, quidquid viderant,
Ministri nequitiae:

8 b. Lucis magnitudinem,
Florum pulchritudinem,
Senatores curiae.

9 a. Audit, dolet, indignatur,
Frendet, furit, cruciatur
Cruciator impius,

9 b. Statim iubet illum tolli
Et reponi lecto molli
Malum parans gravius.

10 ay. Sed frustratur ; nam subiecto
Linquens martyr corpus lecto
Caelo reddit spiritum.

10b. Saxo corpus adligatur

Et in mare praeceps datur
Per manus satellitum.

11a. Sed quos vivens superavit,
De his quoque triumphavit
Spoliatus corpore;

11b. Nam de mari descendentes
Invenerunt hunc clientes
Iacentem in litore.

12 a. Sepultura denegatur,

Corvus ad hoc praeparatur,
Ut vas servet corporis.

12 b. Tandem illud sub arena,
Velit, nolit mens obscaena,
Undae tegunt aequoris.

13 a. Da, Vincenti, te canenti
Nostro gregi, summo regi
Ne quando displiceat;

13 b. Tua prece nos a faece
Mundi serves et enerves
Hostem, ne praevaleat.