331. De sanctis Evangelistis.

1 a. Evangelistas gaudio
Summo colat ecclesia,
De quorum sacro labio
Sacra sumpsit eloquia.

1b. Hi sunt, qui testimonia
Dant redemptoris actibus
Forma signantes varia
Datam fidem fidelibus.

2 a. Matthaeo vultus hominis
Datus, ut probat visio,
Signat beatae virginis
Natum sine contagio.

2 b. Lucas in forma cernitur
Bovis, qui fuit victima,
Christus pro nobis moritur
Oblatio sanctissima.

3 a. Marcus leoni similis
Forma fulget egregia,
Christus leo terribilis
Surrexit die tertia.

3 b. In forma visus aquilae
Iohannes glosat cetera,
Dum post certamen nobile
Christus ascendit aethera.

4 a. Hi sunt illi perpetui
De Paradisi medio
Fusi rivi melliflui
Rigantes evangelio.

4b. Sic nobis aquas dulciter
Sacri dulcoris influant,
Ut nos frui perenniter
Iesu praedulci tribuant.