341. De sanctis Confessoribus.

1 a. Gaude, caelestis civitas,
Et Christo laudes debitas
Pange, quam sancta trinitas
Ornavit sollemniter.

1b. Cuius clara praesentia
Beatorum militia
Perennali laetitia
Exsultat feliciter.

2 a. De quorum coetu (hic) beatus

Est in caelis collocatus

Et a Christo coronatus

Dextera sublimiter.

2 b. O mira Dei gratia
Quae ima ad caelestia
Transfert, cum sanctis gloriam
Dat ineffabiliter.

3 a. Hic, quem sacer ornat actus,
Angelorum compar factus
Et caelestem vitam nactus
Est, qua gaudet iugiter.

3 b. De pressuris est ereptus,
Pacem summam est adeptus,
Dum [ab] angelis exceptus
Est cum hymnis dulciter.

4 a. Hac in die laetitiae
Detur a patre gratiae
Nobis vera spes veniae
Poscentibus suppliciter.

4 b. O quam felix, qui audisti
Dulcem vocem Iesu Christi:
Intra regnum, quod quaesisti
Possidere perenniter.

5 a. Gaude, quia accepisti
Gloriam, quam meruisti,
Dum ad Christum introisti
Exsultans alacriter.

5 b. Tuo posce precamine,
Ut purgati a crimine
Gratulemur cum agmine
Sanctorum aeternaliter.