344. De sanctis Virginibus.

1 a. Per infirma Deus mundi
Fortiora vult confundi
Suae vi potentiae,

1b. Qui, vim suam ut declaret,
Dat in sexu, qui vi caret,
Tot palmas victoriae.

2 a. Caste simul et decore
Christi currant in odore
Via licet aspera,

2 b. Caro cuius ab amplexu
Nec arcentur molli sexu
Nec aetate tenera.

3 a. Ab amplexu Christi caro
Non avellit eas caro,
Census aut ambitio,

3 b. Non avellit metus mortis,
Non mors ipsa, quia fortis
Est ut mors dilectio.

4 a. Si, quam mucro non attingit,
Contra iugem se praecingit
Pruritum lasciviae,

4b. Intestinum habet bellum,
Sed triumphat hoc flagellum
Armis pudicitiae.

5 a. Porro sponsum virginum
Exoremus Dominum,
Ut earum meritis

5 b. Imbecilles famulos
Armet contra stimulos
Tam infesti fomitis.