Capitulum X.

(Vers. I.). Ideo subdit: muscae morientes, id est cogitationes peccatorum sibi succedentes et ad peccatum mortale inclinantes, perdunt suavitatem unguenti, id est, perdunt unctionem, et ita multa bona, quia primae Ioannis secundo : " Unctio docet vos de omnibus ". Vel: suavitatem unguenti, id est internam devotionem et dulcorem sapientiae: Proverbiorum vigesimo septimo: " Unguento et variis odoribus delectatur ".

(Vers. 1. 2.). Pretiosior est sapientia. Hic tertio praemittitur sapientia altitudini mundanae gloriae, vel etiam stultitiae, quam stulti appetunt: Propterea dicit: Pretiosior est sapientia parvaque gloria, id est cum parva gloria, ad tempus, id est temporaliter: melior, inquam, stultitia, etiam cum magna gloria: supra quarto : " Melior est puer pauper et sapiens rege sene et stulto ". Vel potest esse sensus, ut sapientia melior sit stultitia: et etiam parva gloria, ad tempus, id est in debito tempore collata, melior est stultitia.

Et subditur ratio: Cor sapientis in dextera eius, et cor stulti in sinistra illius, per dexteram bona, per sinistram mala: Matthaei vigesimo quinto : (Statuet oves a dexteris suis, baedos autem a sinistris ". Vult ergo dicere, quod sapientes cogitant bona, et stulti cogitant mala: Proverbiorum decimo: "Labiainsti considerant placita, os impiorum perversa ". Dextera dat intelligere bona aeterna, sinistra temporalia: unde

Proverbiorum tertio: " Longitudo dierum in dextera eius, in sinistra illius divitiae et gloria ". Vult ergo dicere, quod sapientes cogitant bona aeterna et cupiunt, et stulti temporalia: Cantici secundo: "Laeva eius sub capite meo, et dextera illius amplexabitur me". Cogitat igitur stultus vana et nescit aliquo modo considerare discreta, nec in se nec in aliis, quod est maius inconveniens. Ideo subdit: Sed et in via stultus ambulans, in via scilicet illa, quae videtur sibi bona: Proverbiorum duodecimo : " Via stulti recta in oculis eius". Cum sit ipse insipiens, id est, cum insipienter ambulet, quia in tenebris ;; supra secundo: (Stultus in tenebris ambulat ". Omnes stultos aestimat, unde Proverbiorum vigesimo sexto: " Sapientior sibi videtur piger septem viris loquentibus sententias ".