1. De ss. Trinitate.

1 a. Summae fons jucunditatis,
De quo cuncta bonitatis
Manant beneficia,

1b. O maiestas unitatis,
O potestas trinitatis,
O summa laetitia.

2 a. Tuae, Deus, vox naturae,
Pulchritudo creaturae
Te laudat per omnia ;

2 b. Quod amare potest, amat,
Te factura tota clamat,
Tot laudes, quot folia.

3 a. Quod sis lux amabilis,
Astrorum fulgentia,
Quod sis delectabilis,
Florum redolentia
Suo modo fatur.

3 b. Tuam pulchritudinem
Solis pulchritudo,
Tuam celsitudinem
Caeli celsitudo
Nobis protestatur.

4 a. Tu lumen veritatis,
Oaelum sinceritatis,
Locus amoenitatis

Tu miranda gloria.

4 b. Tu pomum novitatis,
Oliva pietatis,
Panis saturitatis,
Vinum iucunditatis,
Tu suavis memoria.

5 a. Tu mons excellentiae,
Tu vallis es amoena,
Tu ficus clementiae,
Tu vitis uva plena,
Tu fructus honestatis.

5 b. Tu viror decentiae,
Tu Ulium candoris,
Tu folium recentiae,
Tu vapor es odoris,
Tu rosa caritatis.

6 a. Tu virgae nux,
Tu summa lux,
Tu noster dux,
Ne hostis trux

Triumphet in conflictu,

6 b. Tu caeli ros,
Tu pulcher flos,
Tu nostra dos,
Tu pasce nos

Te, summe, suavi victu.

7 a. Tu malus es pomifera,
Tu nardus odorifera,
Tu cinamomi calamus,
Tu sponsus es et thalamus,
Et amor et amandus.

7 b. Tu frutex aromatica,
Piscina tu probatica,

Tu rex es atque Dominus,
Tu regnum nihilominus,
Tu mirum et mirandus.

8 a. Te vox dulcis philomenae
Organique dulcis sonus
Et humanae cantilenae
Mirus et motivus sonus
Praedicant suavissimum.

8 b. Botrus Cypri, suavis stilla
Et dulcedo favi mellis
Lacte fluens et mamilla,
Hoc testatur, quod excellis,
Quidquid est dulcissi-
mum.

9 a. Tu venustatis libanus,
Dilectionis clibanus,
Tus flagrans in aestate,
Respirans delicate.

9b. Tu mentis es munditia,
Tu vera pudicitia,
Viriditas immensa,
Tu suavitas intensa.

10 a. Ebur candoris,
Aurum decoris,

Tu cedrus es altissima,
Cupressus erectissima,
Tu sidus es fulgoris.

10 b. Cena dulcoris,

Tu cella floris,

Tu domus ornatissima,
Gemma pretiosissima,

Tu princeps es honoris.

11 a. Gloriosus imperator,

Donum et doni donator,
Tu diadema gloriae,
Tu signifer victoriae,
Tu salus et salvator.

11b. Tu de milibus electe,
Te dilectum da, dilecte,
Quod te candoris speculum,
Illustrans omne saeculum,
Intueatur recte.

12 a. Tu balsami fraglantia,
Tu mentis abundantia,
Tu pulvis pigmentarius,
Tu cordis unguentarius,
Tu vitae nutrimentum,
Effusum es unguentum.

12 b. Tu caeli palatium,
Tu decoris spatium,
Tu legis tabernaculum,
Tu velum et oraculum,
Tu mensa deaurata,
Lucerna liliata.

13 a. Tu templum et altare,
Tu puritatis mare,

Tu fumus thymiamatis,
Tu flatus es aromatis,
Tu pictum laqueare.

13 b. Tu verus iubilaeus,
Per te fit liber reus,
Tu mensis es uberrimus,
Tu dies celeberrimus,
Tu summae pacis Deus.

14 a. Leo fortitudinis,

Tu redolens panthera,
Cervus pulchritudinis,
Te quoque pulchra fera
Fatetur laudabilem.

14 b. Laudula, luscinia,

Te pavo speculatus,
Turtur dans suspiria,
Te nisus variatus
Indicat amabilem.

15 a. Te patris potentiam

Creaturae magnitudo,
Filii prudentiam

Ordinata pulchritudo,
Spiritus clementiam
Bonitatis multitudo
Evidenter nuntiat.

15 b. Hinc caelesti hierarchiae
Per novenas acies
Summae relucet sophiae

Gloriosa facies,
De qua nec nocte nec die
Suas flectunt acies,
Quae visa nunc satiat.

16 a. Haec sunt signa, sed remota,
Quibus quaerit mens devota
Sibi sit dulcedo tota,
Quae tot venis adfluit;

16 b. Quam ut nos inveniamus,
Huius opem imploramus,
Quo linquente deviamus,
Sicut ipse docuit.

17 a. Hauriamus ergo gratis
De torrente voluptatis,
Pleno rivis delicatis,
Ubi satis non est satis
Neque nimis nimium.

17 b. Ibi gustus non torpescit,
Appetitus semper crescit,
Satur fastidire nescit,
Sed [gustatum] plus dulcescit
Inconsuetum gaudium.