11. Ad Deum Precatio.

O, qui perpetua mundum ratione gubernas,
Terrarum caelique sator, qui tempus ab aevo
Ire iubes stabilisque manens disiuncta moveri,
Quem non aeternae pepulerunt fingere causae
5. Materiae fluctuantis opus, verum insita summi
Forma boni, livore carens, tu cuncta superno
Ducis ab exemplo, pulchrum pulcherrimus ipse
Mundum mente gerens similique imagine formans
Perfeetasque iubens perfectum absolvere partes.

10. Tu numeris elementa ligans, tu frigora flammis,
Arida conveniant liquidis, ne purior ignis
Evolet aut mersas deducant pondere terras,
Triplicis mediam naturae cuncta moventem
Conectens animam per consona membra resolvis.

15. Quae cum secta duos motum glomeravit in orbes,
In semet reditura meat mentemque profundam
Circuit et simili convertit imagine caelum.
Tu causis animas paribus vitasque minores
Provehis et levibus sublimes curribus aptans

20. In caelum terramque seris, quas lege benigna
Ad te conversas reduci facis igne reverti.
Da, pater, augustam menti conscendere sedem,
Da fontem lustrare bonum, da luce reperta
In te conspicuos animi defigere visus.

25. Disice terrenae nebulas et pondera molis

Atque tuo splendore mica, tu namque serenum,
Tu requies tranquilla piis, te cernere finis,
Principium, vector, dux, semita, terminus idem.