153. De Compassione BMV.

1. Mater Alma Redemptoris,
Iubar Aurei viroris,
Claritatis radius,
Adest en plangenda hora,
Qua cor tuum, o decora,
Pertransivit gladius.

2. Recordare, virgo dia,
Verbum patris et sophia,

Tuus unigenitus,
Iesus Christus captus, caesus,
Spinis diris fronte laesus,

Crucifixus penitus.

3. Ah, quid dicam, spes lugentum !
Mihi si sint linguae centum,

Si facundus fuero,
Virgo, tamen nihil digne,
Nihil tibi coinsigne

Explicare potero.

4. Intuere, rosa, florem,
Vide tuum sic amorem

Exaltatum misere,
Rosascentes patefactas
Mundae carnis catharactas

Quino cerne vulnere.

5. Grandis dolor, quem ferebas,
Quem in corde sentiebas,

Nato cum assisteres,
Ornamentum sic foedari,
Sic virtutem maculari,
Praesto dum aspiceres.

6. O quis dolor, dum spectares,
Dum maternis mundares
Lacrimarum fontibus ;
Rosa rubens pallescebat,
Corpus tuum fatiscebat
Admirandis luctibus.

7. Ab amaro demum fletu
Tibi flenti sine metu

Vultus intumuerat,
Post caligo nebulosa
Tibi, dulcis vernans rosa,

Oculos obvolverat.

8. Rubicunda plane rosa,
Tota rubes, amorosa,

Dulcis nati sanguine,
Omni parte profluentem
Quem dum rapis rosascentem,

Rubescis aspergine.

9. Heu, heu, mors o dura!
Morientis tamen cura

In te sola figitur,
Et nec illam Magdalenam,
Condoloris igne plenam,

Moriens adloquitur.

10. Ites amoris, disclavatum
Corpus rapis cruentatum

Osculando dulciter,
Tibi mortem adoptando,
Corde miti, vultu blando

Flenti maternaliter.

11. Nutabunda sic in mundo
Volvebaris in profundo

Lugubris maestitiae,
Iam sed audis beatorum
Supra choros angelorum

Cantica laetitiae.

12. Dulcis mater, me tuere,
Mei, precor, miserere,

Mater, mater gratiae,
O tu clemens, mater pia,
Virgo mater, o Maria,

Dona locum veniae.