112. De Spiritu Sancto.

1. Veni, sancte spiritus,
Visita nos caelitus,
Funde in nos funditus

Tuae rorem pluviae;
Veni, dulcis, dulciter,
Unge nos suaviter,
Munda nostrae iugiter

Domum conscientiae.

2. Veni, dulcis Domine,
Da frui dulcedine
Caritatis geminae,

Qui es ipsa caritas ;
Veni, nostrum gaudium,
Da maestis solacium,
Da copulam cordium,

Qui es pacis unitas.

3. Veni, amor optime,
Veni, vita animae,
Veni suavissime

Amator humilium;
Veni, dator veniae,
Veni in nos hodie,
Veni, sator gratiae,

Dans reis remedium.

4. De supernis fontibus
Stilla sitientibus
Aquam vivam cordibus

Singulos reficiens,
Uni nos pax unica,
Da lucem, lux caelica,
Tuos tibi dedica,

Amor indeficiens.

5. De patre et filio
Tua est processio,
Tu es ab initio
Omnipotentissimus ;

Tu creasti omnia
Caelum, terram, maria
Proportionalia,

Pacis dator optimus.
6. Tu formasti, Domine,
A mundi origine
Tuo aquas numine,

Salubris salubriter,
Vatibus veridicis
Et figuris mysticis
De adventu iudicis

Praecinens veraciter.

7. Tu obumbrans virgini
Unis Deum homini,
Ut unius numini

Homo sit homo Deus;
Tu fecundas virginem,
Rerum novas ordinem,
Ut per Deum hominem

Salvetur homo reus.

8. Tu praees virginibus,
Tu ades martyribus,
Tu das confessoribus

Gratiam pro gratia,
Per te candet castitas,
Per te fervet caritas,
Per te vitae sanctitas

Regnat in ecclesia.
9. Tu praelatos eligis,
Tu subiectos colligis,
Tu collectos dirigis,

Ut in unum habitent;
Tu es rex humilium,
Tu dux innocentium,
Tu via simplicium,

Ne a te exorbitent.

10. Tu sapores conficis,
Quibus corda reficis,
Tu nos laetos efficis

Ferre iugum Domini;
Tu nos dites munere,
Tu nos ligas foedere,
Tu nos colla subdere

Tuo facis ordini.

11. Tuus sapor allicit,
Tuus odor afficit,
Tuus viror reficit

Nostrae mentis oculos;
Tua dulcis unctio,
Omni plena gaudio,
Forti desiderio

Trahit te ad parvulos.

12. Tu dissolvis odia,
Tu extinguis iurgia,
Tu unis contraria,

Artifex mirabilis ;
Tu adversa temperas,
Tu incepta prosperas,
Tu signata reseras,

Doctor invisibilis.

13. Tibi ergo canimus,
Tibi corda pandimus,
Tibi manus tendimus

Nova danti munera ;
Tu nos in te refice,
Tu nos tales effice,
Quales scis a iudice

Locandos in dextera.