157. De Compassione BMV.

1. Maria, quae Iesu Christi
Iuxta crucem astitisti

Concussa dolore,
Cum videres ex te natum
Mortuum et immolatum
Pro me peccatore,
2. Quo dolore movebatis
Supra tui salutaris

Iesu passione,
Nullus est, qui vel pensare,
Vel ad plenum explicare
Valeat sermone.
3. Nec mirum, nam ipsum pati
Videbas, in quo peccati

Macula non erat,
Sed quem sine genitura
Concepisti, virgo pura,
Si quis modum quaerat.

4. O quam tristis es effecta,
O quam intime confecta

Poena patientis,
Circumquaque cruentatum
Videns ex te propagatum

Corpus innocentis.
5. Videns, inquam, flagellari,
Conspui, colaphizari

Et ut morte dignum
Cum iniustis reputatum,
Manus pedesque clavatum

Super crucis lignum.

6. Videns sursum sic suspensum
In opprobrium immensum

A pravis Iudaeis,
Spinis densis coronari
Potu fellisque potari

Despectum ab eis.

7. Videns eius inclinatum
Caput atque " Consummatum

Est" ipsam dicentem
Audiens, ut commendarat
Ei te, quem praeamarat
Et vidit praesentem.

8. Videns ultimo sacratum
Latus eius perforatum

Lancea pungenti,
Videns tantumque maerorem,
Cumularent ut dolorem

Haec tibi videnti.

9. Tunc, in partu quas nescisti
Poenas, experta fuisti

Materni maeroris,
Tunc, tunc iuxta praedicentem
Pertransivit tuam mentem
Gladius doloris.

10. Sed, Maria, iam laetare,
Quia Christus tam amarae

Passus probra mortis,
Sicut antea praedixit,
Die tertia revixit

Ille leo fortis.
11. Laetare, nam qui descendit,
Ipse est, et qui ascendit

Super omnes caelos,
Ubi secum collocatam
Laudat cunctis te praelatam

Angelorum melos.
12. Illuc, virgo, nos dignare
Filio recommendare,

Cum quo gloriaris,
Quia nobis post eundem
Es fiducia tantundem

Et spes singularis.

13. Mone atque pietatem
Tuam penes egestatem,

Cui subiacemus ;
Spes, quam de te reportamus,
Cuius precibus speramus,

Quod salvi fiemus.
14. Alioquin vice versa
Propter opera perversa,

Quibus inhaeremus,
Si iuste diiudicemur,
Ne, quod absit, condemnemur,

Maxima timemus.

15. Sed, o felix advocata,
Quae clamantibus parata

Soles advenire,
Nostras preces admittendo
Nobisque compatiendo

Velis subvenire.
16. Ut redemptis te iuvante,
Virgo post partum et ante,

Lumen vultus sui,
Velit, nolit hostis victus,
Promat Christus, benedictus

Fructus ventris tui.