18. De Incarnatione Domini.

1. Deas, creator omnium.
Ante mundi principium
Praevidit, ut per filium
Nobis daret consilium.

2. Nox silentium tenuit

Medium, dum sponsus venit
A regalibus sedibus
Donans pacem hominibus.

3. Mirabile mysterium,
Dum virgo parit filium,
Ut sidus profert radium
Intacta nesciens virum.

4. Christi generationem
Quis hominum enarrabit,
Verbi incarnationem
Angelorum quis vestigabit?

5. Verbum, quod pater genuit,
Servile corpus induit,
De matre nasci voluit,
Qui matris creator fuit.

6. De sinu patris prodiit,
Qui lucis auctor exstitit,
Formam hominis induit,
Ne perderet, quod condidit.

7. Maria Christum edidit,
Quae viri thorum nesciit,
Mater Dei efficitur,
Dum Deus homo nascitur.

8. Natus est Dei filius,
Caelorum rex, non alius,
Nasciturque in stabulo
Deus, qui regnat in caelo.

9. Vili iacet praesaepio,
Quem nulla claudit regio,
Apparuit pastoribus,
Qui regnat in caelestibus.

10. Stella fulgens apparuit,
Dum virgo Iesse floruit,
Et reges ferunt munera,
Tus, murram, auri pondera.

11. Maria, virgo virginum,
Quae genuisti Dominum
Sine virili semine,
Verum lumen de lumine,

12. Gratiarum monilibus
Ornaris Christi gratia,
Pretiosis lapidibus
Virtutum fulgens gloria.

13. Tu plena sapientia

Cunctisque charismatibus,

Serva tua potentia

Nos a daemonum insultibus.

14. Tu sempiterno foedere
Caelesti sponso iungeris,
Fac nos illum dulcescere,
Cuius tu mater crederis.

15. Tu verbum vitae tractasti
Tuis sacratis manibus,
Dum Iesum Christum Iactasti
Tuis sanctis operibus.

16. Gaudebas magno gaudio
Nascente Christo Domino,
Dum cerneres in stabulo
Deum, qui regnat in caelo.

17. Quem desiderant angeli
Videre et archangeli,
Cui caelestis curia
Laudem reddit in gloria.

18. Throni, dominationes,
Virtutes et potestates,
Principatus et Cherubim
Laudant cum sanctis Seraphim.

19. Laudant sine cessatione

Christum in caelis regnantem,
Quem sine corruptione
Tu genuisti infantem.