29. De Vita Christi.

Ave, salus nostrae spei,
Iesu Christe, fili Dei,
Qui de caelo descendisti,
Incarnari dum coepisti.
5. Ab angelo nuntiatus,
Ex intacta matre natus,
In praesaepi reclinatus,
Absque domo hospitatus.
Tu a magis adoratus

10. Et in templo praesentatus,
In Aegyptum es fugatus,
Post Herodem revocatus
Et ut homo conversatus,
In Iordane baptizatus,

15. A columba protestatus,
Post ieiunas tu temptatus,
Sed nequaquam superatus,
Ab angelis ministratus,
Post haec mira operatus,

20. Praedicando fatigatus,
Siti, fame maceratos
Et a multis exprobratus,
Adorando cruentatus
Et a Iuda venumdatus,

25. Ab iniquis accusatus
Et iniuste iudicatus,
Absque causa condemnatus,
Caesus, sputus, alapatus,
In derisum purpuratus,

30. De spineto coronatus,
Genu flexo adoratus,
Ab Herode subsanatus,
Iudaeorum rex vocatus,
In columna flagellatus,

35. Ecce homo demonstratus,
Crucem ferre coartatus.
Hanc ferendo es lassatus,
Crucifixus et artatus,
Hac in cruce dilatatus,

40. Felle mixto tu potatus,
Cum clamore lacrimatus,
Pro Iudaeis deprecatus,
Tuo patri commendatus,
Mortis victor morti datus.

45. Nostri causa tu vocatus,
A Longino lanceatus,
Post de cruce tu delatus
In sepulcro collocatus,

Cum custodibus signatus.

50. Ad inferna descendisti,
Inde tuos redemisti,
Terna die surrexisti
Et ad caelos ascendisti
Locum tuis paraturus

55. Et pro ipsis oraturus,
Inde [iudex es venturus
Dans] bonis vitam aeternam,
Malis poenam sempiternam.
Ergo, pie fili Dei,

60. Miserere, precor, mei.

Haec te passum quia nosco,

Toto corde supplex posco,
Ut des mihi paenitere
Et peccata mea fiere,

65. Ut confessus et contritus,
Pane, vino sim munitus,
Ita firme in te credam,
De hac vita dum decedam,
Inveniar emendatus,

70. Post emendam expurgatus,
Ut in bono confirmatus
Et te duce conducatus
Ad te ferar te visurus,
Vultu tuo fruiturus.