28. De Christo.

1. Splendor patris, fons, sol, ares,
Languent oculi solares,
Quae nos salvet, tu sola res,
In te clavis laesos lares
Tutos nobis pares ; ha, res
Mira! Deus patri pares,
Minor patre patri par es,
Nobis vitae mensam pares.

2. Crux est vitis, hac in vite
Botrus Cypri, botrus vitae
Floret, cuius vinum rite
Sumptum sobrium et mite
Et laetum cor reddit. Ite,
Sitientes, et haurite,
Dulcis potus, hunc sitite,
Qui vos sitit, et venite.

3. Cerno portantem dolores,
Corvi per quem in olores
Mutantur, nobis dolor es,
Nostra salus, nostrum cor es.
Homo miser, quid dolo res
Quaeris? tui proditor es,
Est iactura gravis

praeclaros perdere mores.

4. Orat pro nobis patronus,
Cuius est in caelo thronus,
Se pro suis pastor bonus
Dedit nostrum ferens onus,
Colit hunc civis colonus,
Orbis isti servit pronus.

5. En in crucis aret ara,
Munda caro, mundo cara,
Labis expers et ignara,
Obscuratur lux praeclara,
Fecundatur tandem Sara;
Ha, quid quaeris, mens avara ''?
''Quod instat, foro te para,
Amor rarus, fides rara,
Spes exilis, sors amara.

6. Vera salus infirmatur,
Sitit fons, risus tristatur,
Innocentia damnatur,
Vita vivens morti datur,
Dum securitas turbatur,
Tremit orbis et miratur,
Princeps mundi triumphatur,
Caput Sisarae foratur,
Aman perit, superatur
Golias, Eglon necatur.

7. Surgit vita victa morte,
Gazae confringuntur portae,
Philistaeorum cohorte
Iam prostrata dira sorte
Multus illustrat decor te;
Miserere, rex, precor te,
In me sunt tot pestes ortae,
His demptis sequar, dulcor, te.

8. Inexhausta tu dulcedo,

Tibi, quod in me dulce, do;
Dicet quis: Quid? Nihil cedo,

Verbis saepius excedo.
Dulce manna semper edo,
Cum te sumens recte credo,
Fer opem, tibi me dedo,
Fremit mundus, saevit praedo,
Carnis blanditur putredo;
Hanc pestem, Iesu, vix sedo,
Seda tu, mundum ex foedo,
Agnum faciens ex hoedo.
9. In diversa flecto mentem,
In conclavi residentem
Cerno virginem decentem,
Mundam mundum fugientem,
Partem bonam eligentem,
In superna spe tendentem ;
Angelum cernit praesentem,
Verbum dulce proponentem,
Sed attende respondentem
Et ancillam se fatentem,

Dictis fidem adhibentem.
Cerno Christum descendentem,
Servi formam induentem,
Deum cerno vagientem,
Fontem vitae sitientem,
Veste solem indigentem,
Vitam cerno morientem,
Sed agnosco resurgentem
Et cum suis convescentem,
Dehinc caelos ascendentem,
Suos secum adducentem,
Pro nobis intercedentem,
Suis opem conferentem.
10. Quo praecessit, nos sequemur,
Si tamen sequi meremur;
Igitur, ut exaltemur,
Decet, ut humiliemur ;
Sic sic Christum imitemur,
Ut cum ipso coronemur.