32. Ad Christum Oratio.

1. Iesu, dulcis et decore,
Flos odorans miro more,
Sponse meus amorose,
Super modum speciose,

Dilecte mi pulcherrime,
Ubi, quaeso, demoraris,
Ubi vis, ut perquiraris,
Ubi cubas et quiescis,
Qui sic sapis et dulcescis,
O dulcis sapor animae.

2. Trahe me, o mi dilecte,
Mentem meam in te flecte,
Tuo currat in odore,
Fatigato prae amore

Da manum dicens: sequere.
Vide mentem, quae te videt,
Cuius cor ad te subridet,
Nullam curam habet sui,
Ut dilecto possit frui,

O care mi, convertere.
3. Esto mihi, simque tibi,
Ubi cubas, sim et ibi,
Meo mecum sis in lecto
Ac sub uno simus tecto,

Sit lectus noster floridus.
Domus nostra liliosa,
Delicata sit ut rosa,
Nam et noster est dilectus
Pulcher totus et perfectus,

Rubicundus et candidus.

4. Appropinqua, veni, care,
Cum amante convivare,
Ne offendam te amicum,
Tolle, quidquid est iniquum,

De cordis mei medio.
Omne bonum de te spero,
Corde fruar te sincero,
De me vero nil praesumo,
Cuius vita par est fumo,

Tu scis in me, quod nescio.

5. Ergo, Iesu, veni, bone,
In cor meum te compone,
Esto mecum in hac vice,
O dilecte mi amice,

Sic venias, ut sentiam.
Iam cor meum dilatetur,
Et affectus inflammetur,
Sentiat te venientem,
Semper mecum permanentem,

Praegustet suavem gratiam.
6. Ut cum fonte lacrimarum
Cor contritum et amarum
Tuo sancto in altari
Delectetur epulari

Affectu tantae hostiae.
O quam dulcis hic affectus,
Quo dulcescit meum pectus,
Blandus amor atque lenis
Natat meis iam in venis,

O tantae grates gratiae!