96. De Corpore Christi.

1. O Christe, dum nos reficis
Pane sancto filiorum,
De servis filios facis,
Cum panem das angelorum.

2. Gratias tibi Domine,
Qui tuo sacro corpore
Et pretioso sanguine
Me refecisti hodie.

3. Carnem tuam dans in cibum
Atque sanguinem in potum,
Ut reficeres aegrotum,
Te mihi dedisti totum.

4. O beata refectio
Atque mira dilectio,
Dum pauper servus manducat
Christum, qui in caelis regnat.

5. Christe, qui me refecisti
Pane, quem mihi dedisti,
Per mortem, quam pertulisti,
Serva me a morte tristi.

6. Sanguis, qui die Veneris
Effusus es pro miseris,
Ignem exstingue Veneris,
Ne damnemur cum impiis.

7. O caeleste convivium,
O beatorum gloria,
O requies humilium,
Aeterna refer gaudia.

8. Patri, nato, paraclito
Sit laus, honor et gloria
Eiusque matri merito,
Lux nobis, pax et gratia.