179. De VII Gaudiis BMV.

1. Ave, virgo virginum,
Ave, salus hominum,
Ancilla, quae Dominum

Genuisti, virgo, gaude;
Ave, verum gaudium,
Amor et solacium,
Sis mihi principium

Et finis in tua laude.
2. Pater, verbum, spiritus
Assit mihi caelitus

Et tu, plena gratiae,
Ut ad tuum libitum
Sit cor meum deditum,
Reddens tibi debitum

Laudis et laetitiae.

3. Gaudia, quibus plus gaudes,

Honores, virtutes, laudes

Dicam Deo annuente

Corde, lingua, voce, mente.
Primum gaudium de caelis
Venit ore Gabrielis,

Voce dicentis serena:

Ave, tu gratia plena.

4. Per hoc gaudium precamur,
Qui hunc regem veneramur,

Habere propitium,
Ut ab eo protegamur,
Protecti recipiamur

In terra viventium.

5. Secunda laetitia
Fuit ortus nuntia

Angelis canentibus:
In excelsis gloria.
Norunt animalia
Deum in praesaepia
Testibus pastoribus.

6. O Maria, mater pia,
Esto nobis recta via

Apud tuum filium
Atque pro tua gratia
Cuncta pelle vitia

Per secundum gaudium.

7. Post secundam tertia
Fuit stella regia,

Magos cum muneribus

Reges regens praevia,
Deo flexis genibus
Trina dantes munia
Fidem designantia.

8. O Maria, stella mundi,
A peccatis simus mundi

Per te, virgo Maria,
Et virtutibus fecundi,
Laeti tecum et iucundi

Laetemur in patria.

9. Et laetitiae quartae
Maria, soror Marthae,

Fuit fidelis testis,
Cui angelus sic dixit:
Quem quaeritis, revixit,

Ecce, locus et vestis.

10. Ergo, mater creatoris,

Funde preces cunctis horis,

Ut per illud gaudium
Post cursum huius laboris
Beatis iungamur choris
Supernorum civium.

11. Quintum fuit gaudium,
Quando mater filium
Ascendentem vidit caelum
Cunctorum solacium.

12. Per hoc gaudium rogamus,
Ne subici valeamus

Daemonis imperio,
Sed ad caelos ascendamus,
Ubi tecum gaudeamus,

Tecum et cum filio.

13. Sextum sancti spiritus
Dans eis divinitus

Novas linguas, novos sensus,
Scire cunctis penitus,
Nulli in hoc veritus

14. Per hoc gaudium beatum
Ora, virgo, tuum natum,

Ut in hoc exsilio
Deleat nostrum reatum,
Ne sit nobis imputatum
In magno iudicio.

15. Hoc septimum gaudium
Non est par alterius,
Quando Dei genetrix
Assumpta superius
Audivit choros et thronos
Angelorum atque sonos,
Videns suum filium,
Creatorem omnium.
16. Virgo, mater pietatis,
Sentiamus bonitatis
Tuae beneficium,
Ut nos serves a peccatis
Et perducas cum beatis
Ad aeternum gaudium.

17. O Maria, tota munda,
A peccatis nos emunda

Per haec septem gaudia,
Et, fecunda, nos fecunda,
Duc nos tecum ad iucunda

Paradisi praemia.