118. De Conceptione BMV.

1. Iam laetum mundo promitur,
Dum nova lux accenditur,
Sub nube stella tegitur

Ventris sub umbraculo;
Antiquum ius dispergitur,
Scelus nostrum abstergitur,
Dum coluber submergitur
Virginis oraculo.

2. Plaude nunc interius,
Homo fraude perditus,
Te respexit Dominus

Larga pietate,
Quam promisit angelus,
Deitatis nuntius,
Nobis peccatoribus

Pia largitate.

3. Sol contectus nubilo
Congaudet altissimo,
Corpus in corpusculo

Spiritali iubilo
Et in matris gremio
Conridet huic saeculo,
In claritatis speculo

Landem trinam dat Domino.

4. Nunc praefulget claritas,
Haec clara pia raritas,
Virginalis fecunditas
Fecundaque virginitas.
Ave, nata nunc concepta,
Infra matris sacra saepta,
Ab omni malo erepta,
Caelesti sponso adepta.

5. Devotum quam oraculum,
Stupendum quam miraculum,
Dicamus Deo gloriam,
Quod Anna profert filiam.
O quam dulcis et beata
Est haec mater, de quanata
Est haec virgo illibata,
Pro salute nobis data.

6. O quam clamant omnes rei:
Summa salus nostrae spei,
Precor te, sis memor mei
Ante vultum Christi Dei.
Non sis mihi aliena,
Omni bonitate plena,
Rosa vernans et amoena,
De salutis fonte vena.

7, Haec festiva conceptio
Fit laeta omni populo,
Quam celebrat cum gaudio
Nunc in praesenti saeculo.
Tua laus cum gloria
Resonet in saecula,
Nostra sume suspiria
Et da beata gaudia.