176. De VII Gaudiis BMV.

1. Gaude, virgo mater Christi,
Quae per aurem concepisti

Gabriele nuntio,
Dum confestim credidisti
Et sic Fiat protulisti

Adnuens altissimo.

2. Gaude, quae a Deo plena
Perperisti sine poena

Cum pudoris lilio,
Quem de caelo tu traxisti,
Caste, virgo, dum vixisti,

Mundi de auxilio.

3. Genuisti, virgo, solem,
Sicut spina mundum florem

Nova [prorsus] genitura;
Protulisti, mater, prolem,
Qui peccati nostri molem

Aufert per te, virgo pura.

4. Gaude, quod tres dona ferunt
Nato, quem adoraverunt
Virgineo in gremio,

A remotis hi venerunt,
Murram, aurum, tus tulerunt
Adorato Domino.

5. Adorabant, virgo, natum,
Quem tu mihi fac placatum

Peccatori maximo,
Ut meum solvat reatum
Et cum hoc me nunc beatum

Faciat in saeculo.

6. Gaude, virgo, praesentatus
Per te quod est tuus natus

Legis testimonio,
Mundo per te vere datus
Mihi, peto, fiat gratus
Et omni pio populo.

7. Gaude, quia tui nati,

Quem videbas mortem pati,

Fulget resurrectio ;
Gavisi sunt discipuli
Et multitudo populi

Viso pio Domino.

8. Christus tibi, cum surrexit,
Deitatis tunc detexit,

Pia virgo, gloriam
Et te sanctam, quam dilexit,
A dolore sic erexit

Suae mortis dominam.
9. Gaude, mater, ascendente
Christo caelum, te vidente

Motu fertur proprio;
Oro, tibi supplicante,
Ipso memet adnuente

Transfer de exsilio.

10. Iam me taedet et me laedit

Vitae, quia non oboedit

Caro vilis animae,

Unde cum abhinc recedit,
Da videre, quod iam credit,

In caelesti culmine.
11. Gaude, mater, quia scandis
Et est tibi honor grandis

In caeli palatio,
Ubi fructus ventris tui
Per te nobis detur frui

In perenni gaudio.
12. Gaude, quia, ut a sole
Dies fit, a tua prole

Et tua praesentia
Illustrata iucundatur,
Iucundata gratulatur

Tota caeli curia.