25. De Epiphania Domini.

1. O nata lux de lumine,
Miro clarescens ordine,
Apparuisti hodie
Homo natus de virgine.

2. Et magi stella lucente
Veniunt de oriente,
In Ierosolymis quaerunt
Te Christe, quem natum credunt,

3. Tunc Herodes se turbavit
Et scribas ad se vocavit,
Quatenus sciscitaretur,
Ubi Christus nasceretur.

4. Responderunt, ut est scriptum
Et a prophetis praedictum,
Quod de Bethlehem exiet
Dux, qui plebem Dei reget.

5. Tunc Herodes tempus stellae,
Fingens adorare velle,
Sub dolo a magis quaerit,
Dum Christum necari cupit.

6. Transite, inquit Bethlehem
Et quaerite Christum regem,
Diligenter indagate
Et invento nuntiate.

7. Cumque Herodem audissent
Et ab eo recessissent,
Stellam iterum viderunt
Et puerum invenerunt.

8. Gaudebant magno gaudio,
Dum cernunt in tugurio
Christum, qui regnat in caelo
Iacentem in praesaepio.

9. Videntes adoraverunt
Et munera obtulerunt,
Ad regem non redierunt,
Sed Herodi illuserunt.

10. Monitique ab angelo
Iubente Christo Domino
Ad propria redierunt
Per viam, quam non venerunt.

11. Gloria tibi, Domine,
Qui stella duce regibus
Apparuisti hodie
Devote te quaerentibus.