101. De Corpore Christi.

1. Ave, verbum incarnatum,
In altari consecratum,
Verus panis angelorum,
Salus, spes christianorum.

2. Salve, corpus Iesu Christi,
Qui de caelo descendisti
Pro vera mundi salute,
Libera nos servitute.

3. Salve, caro sancta Dei,
Per quam salvi fiunt rei,
Servos tuos redemisti,
Dum in cruce pependisti.

4. Unda, quae de te manavit,
A peccato nos mundavit,
Quod peccavit primus homo
Inoboediens in pomo.

5. Sancta caro, tu me munda,
Sanguinis benigna unda,
Lava me ab omni sorde
Et ab infernali morte.

6. Frange meos inimicos,
Fac mihi eos amicos
Nec non et fastum eorum
Destrue, rex angelorum.

7. Tu, qui es salutis portus,
Praesta mihi tuum corpus,
In exitu meae mortis ;
Libera me, Deus fortis,

8. A leone rugiente
Et dracone furiente;
Sedem da mihi iustorum
Saecula per saeculorum.