195. De Assumptione BMV.

1. Ave, dies laudabilis,
In qua Deus mirabilis

Venit mirabiliter,
Gratiose exclamavit
Et matrem suam vocavit,

Dicens affabiliter:
2. Veni, mater et domina,
Transcende terrae limina,

Tota plena gratia;
Veni, templum deitatis,
Triclinium trinitatis

In aeterna gloria.

3. Nunquam decet dissolvere
Nec in terram resolvere

Corpus immaculatum,
Nunquam fuit infamia
Foetoris nec miseria,

Nisi propter reatum.

4. Caro tua caro mea,
Talis caro non est rea

Cuiuscunque criminis,
Ergo tua non sentiet
Dolorem nec percipiet

Foetorem putredinis.

5. Veni, mater, veni mecum,
Quia ero semper tecum

Filius tuus Iesus ;
Tunc Seraphim exclamavit
Et Cherubim intonuit:

Veni, caeli regina.
6. Et sic omnis hierarchia
Adclamavit voce pia:

Veni, nostra domina.
Haec apostoli videntes
Et angelis respondentes

Dixerunt: Amen, amen.

7. Tunc Maria in corpore
Fulgente miro decore

Exivit de tumulo,
Quam statim Christus dotavit
Et mirabiliter ornavit

Regio ex annulo.
8. Sic in caelum coronata
Ascendit virgo beata

In regali solio,
Ibi pro nobis exorat
Deum patrem et implorat

Clementer cum filio.