163. Planctus beatae Mariae V.

1. Virgo plorans filium
Ductum ad supplicium:
Dic, O rex humilium,

Fili, quid fecisti,
Quia gens incredula,
Mordax velut vipera
Te traxit ad vincula

Et crucem subisti?

2. Te in cruce video
Fixum clavo ferreo,
Dulce fili, defleo,

Dulcis amor meus.
Ecce, mater misera,
Quae te parvum tenera
Nutrivit ad ubera,

Fili mi, O Deus!

3. Moreris et morior,
Pateris et patior,
Maerore afficior,

Tecum volo mori;
Qui es totum gaudium,
Dans Iohannem filium
Sed parvam remedium
Materno dolori.

4. Cerne matrem miseram,
Virginem puerperam,
Quam in annis teneram

Tibi dedicasti,
Ut pupillam oculi
Te servavi saeculi,
Qui peccata populi

In cruce portasti.

5. Fili venerabilis,
Multum delectabilis,
Non est dolor similis

Sicut dolor meus;
Matrem tuam respice,
Fili mi dulcissime,
Noli me deserere,

Dulcis amor meus.
6. Fili mi, tu loquere
Et mori me patere,
Cur me solam linquere,

Fili, vis Iudaeis?
Heu, mors amarissima
Te rapit, O misera,
Iam recedat gratia,

Moreris pro reis.

7. Vadis, vera hostia,
Mortis ad supplicia,
Solus fers stipendia

Ad salvandas gentes.
Ubi Thomas Didymus
Vel Petrus apostolus,
Qui dixerunt "Ibimus
Tecum morientes" ?

8. Sed tu plagas pateris
Manuum ac lateris,
Et tu solus duceris

Ad crucifigendum.
Natus sine crimine
De me matre virgine,
Agnus sine murmure

Is ad redimendum.

9. Cum in te considero,
Certe pati video
Crucis in patibulo

Sine culpa poenas;
Quanta fers supplicia,
Verbera, ludibria,
Habens in opprobria

Tuas sputa genas.
10. Tamquam latro caperis
Et ligatus duceris
A Iudaeis miseris

Mortem crucis pati

11. Heu, Petre, cur frangeris.
Firmam petram deseris?
Pro quo mori asseris,

Iuramentis negas.
Ante multum loqueris.
Postea mulieris,
Naeh, a verbo sterneris

Atque vitam negas.
12. Solus pastor caeditur,
Totus grex dispergitur,
Pastor bonus patitur,

Et crux fugat mortem.
Mors morte destruitur,
Dum sic vita moritur,
Manus crucifigitur

Et destruxit sortem.

13. Quare tanta pateris,
Cum nihil peccaveris,
Quare nunc sic moreris,
Dulcis amor meus?