31. Ad Christum Oratio.

I.

1. Splendor patris, lumen veram,
Salus mundi, sator rerum,
Iesu Christe, summe Deus,
Ad te clamat miser reus,

2. Optans vitam, vitans necem,
Tu gementis audi precem.
Audi, quaeso, deprecantem,
Consolare lacrimantem.

3. Me peccati premit moles,
Miserere, sicut soles,
Vulnerato multis telis
Opem [mihi] ferre velis.

4. Morbis premor, tu divinam
Fer aegroto medicinam,
Affer medicantem manum,
Quae me tactum reddet sanum.

5. Inter lupos cubo graves,
Qui me vorant, nisi faves,
Quam crudeles in me fremunt,
Instant, urgent,iammepremunt.

6. Lupos dico spiritales,

Quorum morsus sunt letales,
Quorum dentes venenati
Virus infundunt peccati.

7. Intus nocent, intus laedunt,
Nunquam cessant necrecedunt
Et, si quando depelluntur,
Saeviores revertuntur.

8. Delectantur tantum nece,
Non fugantur, nisi prece,
Et si precibus cessatur,
Vita mox periclitatur.

9. Sunt crudeles et sunt multi
Et, quod peius est, occulti,
Nam si forsan viderentur,
Te iuvante caverentur.

10. Sunt arguti ad fallendum
Et sunt fortes ad nocendum,
Heu, stultis blandiri sciunt
Et sic plus nocivi fiunt.

11. Vultus celant feritatem,
Precum dant utilitatem,
Sic fallunt incautam mentem,
Sic discindunt non caventem.

12. Sed quid miser ista queror,
Cum me maior coquat maeror,
Heu, mali vicinioris
Nunquam cessantis languoris?

13. Nam si sanum me viderent,
Isti lupi non nocerent,
Nempe, quamvis circumsta-

rent,
Non me tamen laniarent.

14. Dum me vident ulceratum,
In me pandunt mox hiatum,
Totus enim ulcerosus,
Miser, foetens et leprosus.

15. Nec me possum ipse ferre,
Robur fugit, cubo terrae,
Mole pressus sum morborum,
Morbos dico vitiorum.

16. Ach, letali coquor febri,
Pectus urunt aestus crebri,
Aestus sunt libidinosi
Morbi mentis vitiosi.

17. Actus mei mihi sordent,

Motus turpes mentem mordent,
Sed quid dicam meam vitam
Semper malis irretitam?

II.

18. Heu, foedatam ac nigratam
Tuis beneficiis,
Te spernentem, lacessentem
Multis te nequitiis.

19. Cum me partus fudit, artus
De materno viscere
Involatos ac pollutos
Traxi primo scelere.

20. Sed me lavit et mundavit
Tui fontis gratia,
Labem tersit, qua me mersit
Serpentis fallacia.

21. Hoc indigno tu in ligno
Crucis confers, Domine,
Dum per sortem nostram mor-
tem
Pateris pro homine.
22. Pietatis huius gratis

A te mihi praebitae,
Ni sum vanus et insanus,
Memor eram debite.
23. Ast oblitus tui litus
Fugi verae patriae,
Intrans Auctas maris ductus
Flatibus insaniae.

III.

24. Annos intrans pueriles
Actus parvos et exiles

Dicavi nequitiae,
Quod honestum, hoc devovi,
Quidquid decens, hoc removi
Deditus stultitiae.

25. Non sum patrem veneratus,
Verba matris dedignatus
Feci, quod non debui,
Sprevi miser coaequales,
Saepe laesi consodales,
Sic sontem me praebui.

26. Qui levis et dissolutus,
Hunc amplexus, hunc secutus,
Huic libens me tradidi,

Qui traxit ad vanitates
Et qui suasit levitates,

Huic me totum dedidi.
27. Apernatus monitorem

Non secutus sum doctorem,

Disciplinas respui,
Demum, quidquid me iuvaret,
Quidquid mores informaret,

Ore cordis exspui.
28. Sic in praeceps, heu, ruebam,
Callem vitae contemnebam

Mortis iter rapiens,
Nunquam mentem adplicabam,
Vestigare non curabam,

Quid amaret sapiens.

29. Sic a puero crescebam

Et sic crescens assuescebam,

Involvi criminibus,
Et quo magis me foedavi,
Ex hoc esse cogitavi
Plus gratus hominibus.
30. Si quid blandum sentiebam,
Illuc sensus infundebam,

Ibi me prostituens,
Summum bonum aestimavi,
Si tenerem, quod amavi,
Bono me destituens.
31. Illud verum summum bonum,
Quod largitur tuum donum,
Deus meus, abnui,

Quisquis illud ingerebat,
Quisquis illud persuadebat,

Hunc audire renui.
32. Desperatus iam divinam
Respuebam medicinam

Nec aegrotus dolui,
Panem vitae fastidivi,
Potum dulcem non sitivi,

Nam salutem nolui.
33. Quod peccavi, defendebam,
Aeger sanum me dicebam

Fovens mea crimina,
Aegrum febres delectabant,
Quae levarent, me gravabant,

Vitae fugi limina.

IV.

34. Sed nunc, vita mea, Deus,
Via mea, ductor meus,
Nunc revertor ad te reus

Petens a te veniam.
Ovem errantem tu quaeris,
Tu reverso misereris,
Ne me clemens averseris,

Mitem te inveniam.
35. Tu reversum ad te natum
Tamquam de morte relatum
Suscepisti magis gratum,

Quam si non recesserit,
Stola candida vestisti,
Diem festum edixisti,
Epulari praecepisti

Nato, qui revixerit.
36. Verax Deus, ne muteris,
Da, quaeso, quod polliceris,
Suspirantem ne moreris,

Lacrimantem respice.
Portam pulso pietatis,
Aures tango veritatis,
Miserere, pie, gratis,

Mendicum ne despice.
37. Sputa, probra, quae tulisti,
Mors, in cruce quam vicisti,
Sacer sanguis, quem fudisti,

Iram tuam leniant.

Virgo mater, caeli coetus,
Qui te regem laudat laetus,
Quem iam nullus terret metus,

Placatum te veniant,
38. Quo convertas ad me vultum,
Quem offendi miser multum,
Errantemque diu stultum

Digneris corrigere;
Vera salute carentem
Tangas blanda manu mentem
Atque pestem obsidentem

Hanc cures abigere.
39. Igne sancto caritatis
Cremes sordes foeditatis
Atque tuae claritatis

Reformes imaginem,
Germen evellas spinosum,
Nemus uras tenebrosum,
Fetum neces vitiosum,

Des vitis propaginem.

40. Quae de vite surgens crescat,
Dilatetur, ne marcescat,
Irrigetur, ne arescat,

Fonte tui spiritus ;
Sursum crescens erigatur
Nec ad terram deflectatur,
Pingui succo distendatur

Fecundata caelitus.

41. Talem gestans in me vitem
Tristes mortis fructus vitem,
Domum spiritalem ditem

Vitae dulci germine.
Sim fidelis, castus, suavis,
Mente, verbo, facto gravis,
Nunquam me coniungam pra-
vis,
Vivam sine crimine.

42. In te solo requiescam,

In te flagrem nec tepescam,
Ad te curram nec lassescam,

Credam, sperem, diligam.
Sic exutus carne gravi
Laetus fungar luce suavi
Hocque tenens, quod optavi,

Ultra nihil eligam.