2. De ss. Trinitate.

1. Tremendus in potentia,

Suavis in amore,
Qui cuncta creat entia

Mirabili decore,
Hic indivisus trinus est
Ac inconfusus unus est

Incomprehenso more.
2. Requirunt naturaliter

Creata creatorem,
Qua valent laude pariter

Eidem dant honorem,
Se clamant pulchre condita,
Suaviter disposita,

Sed ipsum pulchriorem.

3. In corde pater genuit
Aequalem sibi prolem,
Qua polos caeli statuit

Cum astris lunam, solem,
In terra iuga montium,
Abyssum, rivos fontium
Vastique mundi molem.

4. Naturam unigenitus

Non deserens paternam
Ad nostram venit caelitus

Misericors cavernam,
Peccatis nos purificans,
Miseriam mortificans
Et mortem sempiternam.

5. In deitate socius

Est spiritus utrique,
Procedens amor medius

Fert gratiam ubique,
Septenis in muneribus
Purgatos a sceleribus

Saluti dat antiquae.
6. Triformis Deus nomine,

Conformis maiestate,
Virtute par et numine

Sub vocis trinitate,
Personis est proprietas,
Essentialis unitas

Stat in aeternitate.
7. Abyssum tantae gloriae

Non valet quis metiri,
Resiliunt memoriae,

Cordati cessant viri,
Haud ardens Seraph sufficit,
Humana mens hoc deficit

Ad plenum experiri.
8. Sublimis Deus caritas,

O trinitas beata,
Servorum tua bonitas

Indulgeat peccata,
Nociva cuncta remove,
Auxilio nos refove,

Da praemia optata.