41. Ad Christum Oratio.

1. Adonai, rex omnium,
Salus et spes fidelium,
Qui non habes initium
Et regnas in perpetuum,

2. De tuis non est numerus,
Rex, miserationibus,
Tu igitur piissimus
Meis adesto precibus.

3. Propter tuam clementiam
Atque misericordiam
Da de peccatis veniam
De malisque custodiam.

4. Parce meis criminibus
Nec non iniquitatibus,
Qui parcis paenitentibus,
Esto mihi propitius.

5. Erue me a noxiis
Et pravis desideriis,
Ab hostium insidiis,
Ab inferni suppliciis.

6. Da mihi, benignissime,
Hic locum paenitentiae,
Priusquam ab hoc corpore
Egressus fiat animae.

7. Fac me, quod spernis, spernere,
Quod diligis, diligere,
Me cunctis locis protege,
A cunctis malis eripe.

8. Virtutes in me insere,
Quae sint acceptae coram te,
Quibus possim proficere
Et in bono persistere.

9. Dona donum auxilii,
Sis mihi spes refugii,
Inter fluctus huius saeculi
Ne mergar, mihi subveni.

10. Tuos super me oculos,
Rex, aperi piissimos
Et mitte sanctos angelos
Hodie mihi socios.

11. Libera me ab hostibus
Malignis spiritalibus,
Ab iniquis hominibus
A cunctisque doloribus.

12. Diem largire prosperum,
Praesentis vitae gaudium,
Tu in me insurgentium
Compesce fauces omnium.

13. Audi mea precamina
Dimitteque peccamina,
Fiantque cuncta omnia
Per sanctorum suffragia.

14. Te Iesum super omnia
Fac diligam per saecula,
Ut cum sanctis in gloria
Tua laudem magnalia.