51. De Passione Domini.

1. Salve, Iesu, natus de virgine,
Candor lucis et sol iustitiae,
Imago patris et fons gratiae,
Princeps pacis atque rex gloriae,
Vcrus Deus.

2. O quam fervens tua dilectio,
Quam dulcis, quam pia dignatio,
Quod pro me tam vili vermiculo,
Te tanto exponis supplicio,
Amor meus.

3. Ecce, quam stupendum spectaculum,
Verus Deus, virtutum speculum,
Flagellatur per suum populum,
Pro quo descendit in hoc saeculum,
Ne periret.

4. Obstupescat mens atque ratio
Nec non simul superna contio,
Quod talis, tanta dominatio
Facta est perfidorum abiectio,
Ut salvaret.

5. O quam plenus amaritudine,
Exaratus virgis dirissime,
Rubricatus undique sanguine,
Per quem laver, quaeso, a crimine,
Ego reus.

6. Speciose prae filiis hominum,
Converte ad me vultum roseum,
Debrietur cor fonte vulnerum,
Ut plus amem te meum Dominum,
Quod es Deus.

7. Quid fecisti, regalis Domine,
Qui semper vixisti purissime,
Sine labe et sine crimine,
Et tamen caederis ab homine
Tamquam reus?

8. O quis fuit tam temerarius,
Tam perversus tamque nefarius,
Quod te, Iesus, quo nihil carius,
Sic flagellis caedit tam acrius,
Cum sis Deus?

9. Iesu, iudex irrefragabilis,
Deus fortis, Deus terribilis,
Cum veneris in caeli nubeculis,
Contremiscet tunc homo, fragilis

Creatura.
10. Salvator meus, plenus gratia,
Patefac mihi tua vulnera,
Ut nunc atque in mortis horula
Delitescat mens mea misera

Sine cura.