3. De sanctissima Trinitate.

1. Fidem sanctam orthodoxam,
Ut vitem aetemam noxam,

Fateor veraciter,
Dicens, quod est unus Deus,
Non plures, ut Manichaeus

Errat damnabiliter.
2. Iste Deus aeternalis,
Pater exstat naturalis

Generando filium
Eundem in deitate,
Sed tamen proprietate

Personali alium.
3. De persona genitoris

Exit per modum splendoris

Dei patris filius,
Ut genitus a gignente,
Sicut verbum a dicente

Et a fonte fluvius.
4. Est in ipsis vis activa,
Quae vocatur spirativa,

Qua procedit tertia
Persona, qua conectuntur
Pater, proles et fruuntur

Coaequali gloria.
5. Sunt unius voluntatis,

Per quam dant rebus creatis

Esse, posse, agere,
Cuncta, quae sunt et fuerunt,
Ab his tribus inceperunt

Esse, sed ex tempore.
6. Mundum purgat a peccatis
Virtus sanctae trinitatis,

Cui se communicat,
Quia, cum sit summum bonum,
Nulli negat suum donum,

Sed omnes sanctificat.
7. Et post huius vitae flatum
Resuscitat integratum

Mortuum de pulvere,
Perducens ad talem statum,
Qui facit ipsum beatum

Sine fine vivere.

8. Adhuc credo sana mente,
Quod angelo nuntiante

Verbum caro factum est,
Mysterium facti tanti
Virtute spiritus sancti

Perfecte completum est.

9. Huic addo fide pia,
Quod de virgine Maria

Iesus Christus nascitur,
Ut loquuntur prophetiae,
Et in libro Isaiae

Manifeste scribitur.
10. Erat homo verus Deus,
Qui ut liberetur reus,

Morti se exposuit,
Iudicatus, flagellatus,
Patibulo condemnatus

Spiritum deposuit.

11. Cuius vita consummata
Anima glorificata

Descendit ad inferos,
Infideles reprobavit,
Iustos omnes liberavit,

Derelinquens ceteros.

12. Exsurgens tertia die
Praesentavit se Mariae

Et suis discipulis,
Probans resurrectionem
Carnis per suum sermonem

Et multis miraculis.
13. Sic opere consummato
Et homine reparato

Die quadragesimo
Super caelos elevatur
Et in throno collocatur

Aequalis altissimo.
14. Tandem ad nos reversurus,
Patenter iudicaturus

Facta iam praeterita,
Malos trudens in infernum,
Bonis dans regnum aeternum

Iuxta sua merita.