13. Oratio Paenitentis ad Deum.

1. Audi, Deus creaturam,
Tuis factam manibus,
Corporalem plasmaturam.
Sumptam de pulveribus
Spiritumque viribus
Mirandis, tuam figuram,
Imaginem et picturam
Ornatam monilibus,
Salubribus
Evectam instinctibus.

2. Huius tamen creaturae
In natura splendidae
Innumerae sunt pressurae,
Pestes surgunt horridae,
Medullae sunt tabidae,
Multus est lapsus naturae,
Multae membrorum iacturae,
Compages sunt languidae,
Ut morbidae,
Vires sunt invalidae.

3. Sensus gesto pronitatem
Et concupiscentiam,
Intellectus caecitatem
Et insipientiam,
Carnis immunditiam,
Appetitus vanitatem,
Passionum gravitatem,
Cordis inconstantiam
Et variam
Spiritus miseriam.

4. En, homo de matre natus
Brevi vivit tempore,
Multis malis adgravatus
Destitutus robore,
Qui mox habet abfore,
Ut flos nascendo siccatus,
Ut globus umbrae fugatus,
Ut errans in nemore,
In corpore
Repletus dedecore.

5. Ergo, magne Deus, quare
Contra siccum folium,
Quod ad ventum nequit stare
Praeparas iudicium,
Vis inire proelium,
Vis contra victum pugnare,
Vis potentiam monstrare
Contra fratrem vermium,
Fers gladium
Contra spumam imbrium ?

6. Ut quid, Deus, aestimasti

Me tibi contrarium,
Cur in me manum armasti

Ut in adversarium?

Ad meum excidium
Vias meas explorasti,
Opera mea notasti,

Meum scribens studium

Et otium

Actuum sequentium.

7. Figule, quare figmentum
Tuum vis conterere?
Domine, quare iumentum
Tuum vis exstinguere,
Pastor, ovem perdere,
Fons, vis negare fluentum,
Dux, vis gregis vexamentum,
Pater, vis nos linquere?
Quid facere
De tuo vis opere?

8. Ego tuus sum, non meus
Nec me ipsum iudico,
Pro tuo te precor, Deus,
Orans pro me modico,
Tua iura praedico;
Tua res sum, quamvis reus,
David vel Iob vel Zachaeus,
Pro tua re supplico,
Me abdico,
Te autem glorifico.

9. Quare, pater, intuere

Alumnum tam anxium
Eiusque morbis medere,

Collapso da brachium,

Lugenti solacium,
Caecum fac lumen videre
Miseroque miserere,

Praebens ei gremium,

Refugium

Paenitentum omnium.

10. Honor tibi non adcrescit
Ex damnatu pauperis,
Tua manus invalescit
In sui rem operis,
Rem tuam persequeris;
Factum per te cor stupescit
Et desperans evanescit,
Nisi tu peperceris
Ac sceleris
Vulnera curaveris.

11. Miserere, miserator,

Quia nimis anxior,
Corruens praevaricator

Spiritus est tristior ;

Dolore confodior,
Cernens, quantus sum peccator,
Draconis factus sectator,

Mortuo miserior,

Amarior,

Vivens enim morior.

12. O dulcis fons bonitatis,
O dulcor clementiae,
O piscina pietatis,
Hos misericordiae,
Mihi, iudex hagie,
Parce, parce sceleratis,
Imbrem funde caritatis,
Munus praesta veniae,
Tu gratiae
Largitor es et gloriae.