19. De Incarnatione Domini.

1. Ex adflatu divini flaminis

Verus Deus a summis veniens,

Portam vitae nobis aperiens

Subintravit secreta virginis.

2. Gravidatur virtute numinis

Virgo regem laeta suscipiens,

Deum nobis hominem pariens

Primi lapsum purgantem hominis.

3. O quam virgo felix sanctissima,

Salutata per Dei nuntium,

Hortus florens, lux serenissima,

Facta mater gignendo filium.

4. Incorrupta mater piissima

Post et ante hoc puerperium,

Iacob stella, sed splendidissima,

Trinitatis simplae triclinium.

5. Puer nobis datus est hodie

Prophetatus a sanctis patribus,

Summus regnans in throno gloriae

Conversatusque cum hominibus.

6. Nobis datus filius gratiae,

Luce caecis rite sedentibus

In obscuris et umbra sauciae

Iter dedit mundum a sordibus.

7. Felix dies, mater et filius,

Felix mundus mundum suscipiens,

Fecundator felix et nuntius,

Felix homo Deum parturiens,

8. Illustrator sedens superius,

Devotorum corda respiciens,

Pius nobis sit et propitius,

Nos post vitae cursum recipiens.