20. De Nativitate Domini.

Nos regat aeternus custos, partus hodiernus,
Nobis placatus de virgine sit generatus,
Nos a peccatis purget flos virginitatis,
In nostra cura stet caelestis genitura.

5. Caelestis proles nobis superos det honores,
Nostrum peccatum laxet verbum caro factum.
Virgine de feta sint tempora nostra quieta,
Virgineus fructus det nos postponere luctus.
Nos evangelicis purgemur crimine dictis,

10. A patre nos missi salvet benedictio Christi.
Virgineus partus sibi nostros mancipet actus,
Matris plasmator nos protegat auxiliator.
Nos radix Iesse semper salvos velit esse,
Rex incarnatus benedicat nos miseratus.

15. Nos de natura Christi fugiant nocitura,
Virgineus natus nos mundet sorde creatus.