23. Ad Christum infantem.

1. Ave, Iesu parvule,

Regnum rex sublimis,

Nobilis infantule,

Deus magne nimis.

2. Ave, admirabilis,

Tam fortis et famosus,

Tam pulcher, tam amabilis

Et totus gratiosus.

3. O mentis desiderium,

Iesu desiderate,

O nobile principium,

O Deus incarnate,

4. Venisti, amantissime,

Propter me venisti,

O Deus, plus quam optime,

Sic me attraxisti.

5. Salve, salus omnium,

Puerule formose,

Candens plus quam lilium,

Rubens instar rosae.

6. Mei cordis gaudium,

Mea tu dulcedo,

Tuae matris gremium

Propter te accedo.

7. Vim magnam cordis patior

Pellente me fervore,

Amore tuo crucior,

Iam veni, flos decore.

8. Da mihi o dulcissima

Tuum da dilectum,

Mea languet anima,

Iam patitur defectum.

9. Quamvis sim pauperculus,

Quamvis sim peccator,

Tuus tamen famulus,

Tuus sum amator.

10. Da, Maria, puerum,

Da, quem debes dare,

Veni, salus pauperum,

Veni, Iesu care.

11. Tange me et effice

Digne te gustare,

Velle meum aspice,

Volo te portare.

12. Te cupio, te sitio,

Modo non morare,

In cordis mei gremio

Debes repausare.

13. O sarcina suavissima,

Mihi coaptare,

In mea prorsus anima,

Quam dulcis sis, appare.

14. O sapor omnis gratiae,

In me velis pausare,

Mecum, precor, hodie

Et semper commorare.

15. Qui te meae formulae

Dignaris conformare,

Animae da tremulae

Te leniter tractare.

16. Totus in me labere,

Omnis fons dulcoris,

Ut te portem, patere,

Flos rosei decoris.

17. Ad veri solis radium

Te aperi, cor meum,

Expande late gremium

Praesentem habens Deum.

18. Te meis in brachiis,

Dilecte mi, amplector

Et totis ex praecordiis

Tibi condelector.

19. Ad tam dulcem gratiam

Me totum distendo,

Si tamen patientiam

Tuam non offendo.

20. Non debet tua bonitas

Inanem me transire,

Sed, quae sit tua pietas,

Fac me plene sentire.

21. Tuum ad pectusculum

Me totum inflecto,

Ubi dulce osculum

Daturus sum dilecto.

22. Cordi meo proximus

Super me repausa,

Non gravet te, quod agimus,

Cum tu sis in causa.

23. Tuae grates gratiae

Refero dilecte,

Tua fruens facie,

Prae milibus electe.

24. Non est tui similis,

Dulcis et decorus,

Iucundus, amabilis,

Quem laudat caeli chorus.

25. Quam magnus, quam parvulus,

Quam tener, quam fortis,

Tu dominus, tu famulus,

Tu consors nostrae sortis.

26. Modo te deosculor

Et brachiis amplector,

Afficior et gratulor

Et plurimum delector.

27. Super hoc pectusculum

Os ac vultum pono,

Figo mentis osculum

Te amans corde prono.

28. Quando hoc caruere

Conturbatus gemo,

Mecum intus confero,

Te mihi tollet nemo.

29. Si tu vis abscedere,

Tunc me cogis fiere,

Peto te, rex gloriae,

Mecum permanere.

30. Te nunc inter brachia,

Dilecte, constringo,

Amoris haec indicia

Nec simulo nec fingo.

31. Nil unquam sensi dulcius

Nec ita sum affectus

Nec unquam delicatius

Sum, fateor, refectus.

32. Amore totus aestuo,

Fecisti me ardere,

Prae gaudio iam defluo,

Non possum me arcere.

33. O decore parvule,

Flos nimium formose,

Amabilis infantule,

Figuram gerens rosae.

34. Quid iaces in stabulo

Caeli margarita?

In tam vili lectulo

Tu quid iaces ita?

35. Ubi pulviuaria,

Ubi pluma lenis?

Tibi desunt omnia,

O quam pauper venis.

36. Membra tua tenera,

Costas infantiles

Strata premunt aspera,

Panni tegunt viles.

37. Te arta ligat fascia,

Qui solvis compeditos,

Humiliant praesaepia,

Qui relevas attritos.

38. Hic membra foves tenera,

Pausas et quiescis,

Qui patris sedens dextera,

Quid sit labor, nescis.

39. Pro pluma tibi vilibus

Straminibus subiectis

Exemplum es humilibus,

Egenis et abiectis.

40. Praesaepe tuum floribus,

Purpureo decore

Vestiri modis omnibus

Decebat cum honore,

41. Gemmis, rosis, flosculis

Et liliis vernare

Et praeclaris titulis

Auro fulgurare,

42. Quia in se Dominum

Fert deliciosum,

Universis hominum

Prae filiis formosum.

43. Ut saccum hunc indueres,

Te caritas instruxit,

Ut perditos requireres,

Ipsa te induxit.

44. In lectum tam asperum

Ipsa te locavit,

Pluresque in posterum

Labores procuravit.

45. Accipe nunc osculum,

Indicium amoris,

Tuum ad pectusculum,

O salus peccatoris.

46. Tolle tuum puerum,

O genetrix formosa,

Semper habe gaudium,

Tu lilium, tu rosa.

47. Infantis membra tenera

Casta manu tracta,

Nato praebe ubera,

Hunc pasce, fove, lacta.

48. Mamillis tuis applica,

Virgo, tuam prolem,

O mater deifica,

Caelorum pasce solem.

49. Pasce pascentem omnia,

Virgo, tuum natum

Fove foventem omnia,

In sinu collocatum.

50. Stringe, virgo regia,

Regem amplexatum,

Osculis te satia

Ad os mellificatum.

51. Quam dulcis osculatio

Ad genas parvi Christi

Et labii impressio,

Tu sola, virgo, scisti.

52. O admiranda suavitas,

Gena coniuncta genae,

Quam dulcis haec satietas,

Tu, virgo, nosti plene.

53. Vale, spes fidelium,

Dulcis mater Christi,

Nobis fac propitium,

Quem tu genuisti.

54. Vale, salus omnium,

Salutis cum auctore,

Dans verum nobis gaudium

In vero salvatore,

55. Vale, caeli tripudium,

Vale, valde decora,

Tuum dilectum filium

Pro nobis semper ora.

AdminBookmark

Nunquam mihi melius

In omni mea vita,

Nec unquam sensi dulcius

Nec sum affectus ita.

AdminBookmark

Non possum te dimittere,

Digneris hic manere,

Et si vis discedere

Me cogis post te [pro te H] fiere.

AdminBookmark

Da mente excedere,

Da tibi inhaerere,

Ac si me relinquere

Vis et hinc abire,

Dona sic te quaerere,

Ut possim invenire.

AdminBookmark

O decore parvule,

Flos nimium formose,

Amabilis puerule

Figuram gerens rosae.

AdminBookmark

Et labris tange labia

Ad os deificatum.

AdminBookmark