26. De Transfiguratione Christi.

1. O cor meum, confortare,
Christo sponso conformare

In mortali corpore,
Ut post tristes nunc agones
Subsint consolationes
In futuro tempore.

2. Vide regem hic despectum,
Sputis litum, spinis tectum,

Non habentem speciem,
Ut levatum celso throno
Cernas cum immenso dono
Facie ad faciem.

3. Corpus tuum reformabit
Suaeque configurabit

Claritatis corpori,
Quod in suo demonstravit,
Ipsum quando transformavit

Divo suadens operi.

4. Quodvis asperum, quod artum,
Quamvis cum dolore partum,

Non evacuabitur,
Laetam spem datsplendor vultus
Christi, noster labor multus
Inde praemiabitur.

5. Adest patris vos contestans,
Lucem nubis sibi gestans

Spiritus paraclitus,
Quod sit filius dilectus,
Doctor verus, doctor rectus

Sibique complacitus.

6. Inter legem et prophetas
Complens utrorumque metas

Salvator apparebat,
Testem habens utrobique
Suae mortis, quam inique

Iudaea infligebat.

7. O amator plasmatorum,

Consolator orphanorum,

Rex aeternae gloriae,

Quos ad sortem regni ducis,

His fulgorem tuae lucis

Dignaris praeostendere.

8. Ut illuminato corde
Et detersa mundi sorde

Lumen cernant lumine,
Ad te tendant fontem vitae,
Voluptatis concupitae

Debrientur flumine.

9. Quam sit bonum ibi esse,
Contestati sunt expresse

Viri evangelici,
Qui praesentes adfuerunt,
Quam sit dulcis praesenserunt

Sapor regni caelici.

10. O mi Deus, nos conforta,
Nos infirmos hic supporta,

Nobis illucescere,
Benedic et miserere,
Qui dixisti lumen vere

De tenebris splendescere.

11. Cognoscamus viam tuam,
Agat quis salutem suam,

Dum tempus hic habemus,
Ut cum apparebis iustis,
Videamus te cum istis,

Ad nuptias intremus.