35. Ad Christum Oratio.

1. Iesu, virtus deitatis,

Patris sapientia,
Tu es dextra maiestatis,

Par patri potentia,
Auctor universitatis,

Rex et regens omnia.

2. Tu es splendor et figura

Paternae substantiae,
Verbum factum caro pura,

Carens carnis carie,
Et creator creatura

Ex David progenie.
3. Tu es mitis et severus,

Humilis, altissimus,
Agnus mitis, leo ferus,

Clemens [et] iustissimus,
Deus fortis, homo verus,

Potens et piissimus.
4. Tu es iudex pietatis,

Fons tamen clementiae,
Deus fortis, auctor pacis,

Rex tamen iustitiae,
Vindex iustus pravitatis,

Vena tamen veniae.
5. Tu es novae lator legis

Et largitor veteris,
Rex et natus summi regis

Descendens de superis,
Ovem ad ovile gregis

Reportans in umeris.
6. O peccati paenitudo,

Reatus remedium,
Tu erroris rectitudo,

Doloris refugium,
Tu amoris plenitudo,

Pudoris conubium.

7. Tu es pacis gratitudo,

Timoris iustitia,
Tu in via fortitudo,

Praemium in patria,
Sanctorum beatitudo,

Angelorum gloria.
8. Tu es legis plenitudo,

Gratiae tu largitas,
Fidei tu fortitudo,

Tu spei profunditas,
Caritatis latitudo,

Via, vita, veritas.
9. Te adoro, mi creator,

Tuo factus numine,
Te collaudo, mediator,

Cuius vocor nomine,
Te saluto, mi salvator,

Emptus tuo sanguine.
10. Salve, fili Dei, Deus,

Splendor paternae gloriac,
Vita mea, Deus meus,

Amor et deliciae,
Tibi laudes, licet reus,

Cantabo cotidie.
11. Ave, fuga tenebrarum,

Lux solis et siderum,
Iesu, salus animarum,

Medicina scelerum,
In hac valle lacrimarum

Respice me miserum.

12. Vale, via beatorum,

Iesu, pacis visio,
Via vitae, spes lapsorum

Et eorum redemptio,
Ad te miser peccatorum

Mole pressus fugio.