36. Ad Christum Oratio.

1. O rex, pater gentium,

Caeli triumphator,
Cunctorum gementium

Pius consolator,
In eum credentium

Firmus consolator,
Devote colentium

Es remunerator.

2. Ad terras pro homine

Victor descendisti
Et de matre virgine

Nasci voluisti,
Quam sacro spiramine

Totam replevisti,
De qua, caeli domine,

Carnem assumpsisti.

3. Patris tui genitus

Nos illuminasti
Et cunctorum gemitus

Pius illustrasti,
Veniens divinitus

Hostem sic fugasti,
Ad ovile caelitus

Ovem revocasti.

4. Nam passus pro homine

In cruce fuisti,
Et pro nostro nomine

Sanguinem fudisti,
Cunctipotens Domine,

Sic nos redemisti,
Solutos a crimine

Et a poena tristi.

5. Fac nos, rex piissime,

Cunctos te timere,
Victor potentissime,

Peccata deflere,
Post mortem plenissime,

Christe, te videre,
In caelis laetissime

Tecum congaudere.