37. Ad Christum Oratio.

1. Christe, fili summi patris,
Per amorem tuae matris,
Cuius venter te portavit
Et te dulci lacte pavit,

2. Te per ipsam oro supplex,
Quia tu es salus duplex,
Salus rerum mundanarum
Atque salus animarum.

3. Te nunc precor licet reus,
Miserere mei, Deus,
Miserere, miserator,
Quia vere sum peccator.

4. Tu peccata dele mea

Et cor mundum in me crea,
Da spem firmam, fidem rectam
Caritatemque perfectam.

5. Et concede finem bonum,
Quod est super omne donum,
Ut in corde sic compungar,
Tibi, Christe, quod coniungar.

6. Fac me digne manducare
Corpus tuum salutare,
Ira tua ne me gravet,
Sanguis tuus sic me lavet

7. Extra corpus et in corde
A peccatis et a sorde,
Mors si carnem meam frangat,
Mors secunda non me tangat.

8. Licet caro imputrescat,
Spiritus tecum quiescat,
Ut dum instet hora mortis,
Angelus tis assit fortis,

9. A te datus mihi custos,
Qui me locet inter iustos,
Ut resurgam te visurus,
Tecum semper permansurus.