46. De Passione Christi.

1. Christe, via, quae perducis

Ad supernae lucem lucis,

Purga labe labia,

Ut in cruce laudem crucis

Exaltando de caducis

Volem ad caelestia.

2. Post Mariam, virgam Iesse,

Cuius fructu, cuius messe

Cuncta vivunt saecula,

Designanter et expresse

Virgam crucis dat prodesse

Legis nostrae regula.

3. Illam caeli ros irrorat,

Istam pingit et colorat

Sanguinis effusio,

Honor summus hanc honorat,

Illam flore non deflorat

Floris generatio.

4. Nihil habet hoc secundum,

Christus vivens, passus mundum

Voluntate propria

Altum tenens et profundum,

Ab immundo mundat mundum,

Propter hostes hostia.

5. Vermes amat hamus ille,

Per quem serpens in maxillae

Parte laesus vincitur,

Suae fraudis artes mille,

Suus ignis ad favillae

Finem non perducitur.

6. Botrus Cypri vecte vectus,

Cuius sacrum colit pectus

Immortalis gratia,

Gloriosus et abiectus

Fit protector, non protectus

A mortis angustia.

7. Bum iuvcnca concrematur,

Ut sollemnis impendatur

Iudaeis aspersio,

Byssus Christi purpuratur

Et colore, quo purgatur,

Rosa praestat lilio.

8. Ut amarum non sit mare,

lonam sorbet sed vorare

Clausum nequit bestia,

Christus, templum et altare,

Templum solvens restaurare

Die novit tertia.

9. Hic est vermis matutinus,

Corruptelae non vicinus,

Sol, qui siccat hederam,

Quem sustollens alta pinus

Infert ei nihil minus

His, qui vivunt perperam.

10. Habitavit urbem lunae

Prostituta, sed impune,

Quae sub typo criminum

Figuravit opportune

Sacram funus suo fune,

Quo pependit coccinum.

11. Ut plus agat in agone

Decus serti vel coronae

Coaptatur crinibus,

Et soluta quaestione

Punctionem punctione

Vepres fugat vepribus.

12. Inserebat illi serto

Auctor certus in incerto

Maiestatis gloriam,

Dum clamaret in aperto

Sed desertam in deserto

Aquam vitae consciam.

13. Dum acetum, dum fel ori

Ministratur, peccatori

Sacrans Deus calicem,

Non humano more mori

Dedignatur, sed cruori

Miscet latus laticem.

14. Commendatur sepulturae,

Sepelitur tus in ture,

Balsamita balsamo,

Puncto noctis secuturae

Usurpato claudit iure

Talem tali thalamo.

15. Iste lapis est iacinthus,

Dum rex caeli iacet intus,

Lapis clausus lapide,

Vinctos solvens ipse vinctus,

Deus vivens vir exstinctus

Zelo gentis invidae.

16. Auctor vitae, princeps pacis

Frangens minas et minacis

Lenta reddens brachia,

Tu divisos unum facis,

Rapiendo contumacis

Spoliatus spolia.

17. Tu qui caeli lato lates,

Tuae dignas fero grates

Non ingratus gratiae,

Fac, ut tendat tuus vates

Per has poenas ad pennates

Permanentis gloriae.