47. "Sequitur devotus rigmus dominicae passionis."

1. Christus Deus homo natus
Et in mundo conversatus
Poenam tulit damnatorum
Absque noxa peccatorum.

2. Tentus namque a Iudaeis
Et oblatus Pharisaeis,
Innocenter accusatur
Et probrose iudicatur.

3. Hoc a gente infideli
Auctor mundi, rector caeli
Ultra suffert non invitus,
Tamquam sui sit oblitus.

4. Iudicatus flagellatur,
Flagellatus condemnatur
Et in manus impiorum
Datur princeps angelorum.

5. Caput eius venerandum
Atque cunctis adorandum
Plexis spinis coronatur
Et per sputa inquinatur.

6. Spinae pungunt, guttae ruunt,
Genae madent, sputa fluunt
Et saliva foedi oris
Vultum replet salvatoris.

7. Vestis ei purpurata
Est in dolo praesentata,
Qua indutus adoratur
Et derisus verberatur.

8. Genu flexo dicunt Ave,
Verbum bonum et suave,
Sed amarum nimis dictum,
Quando manus praebet ictum.

9. Nam post cultum simulatum
Colaphizant adoratum,
Ora velo contingentes
Et velatum ferientes.

10. Quasi latro, quasi reus
Sic tractatur homo Deus,
Tractus, caesus et consputus
Non respondet quasi mutus.

11. Inter reos deputatur
Et sub cruce incurvatur,
In augmentum dirae sortis
Portat signum suae mortis.

12. Ligno crucis applicatur
Et in altum exaltatur,
Manus, pedes distenduntur
Atque clavis transfiguntur.

13. Ibi pendet ut leprosus
Ille forma speciosus,
Corpus eius ligno strictum
Pendet tamquam maledictum.

14. Murram sumit et acetum,
Quibus erat vas repletum,
Quod dabatur sitienti
Et iam paene morienti.

15. Post haec caput inclinavit
Et sic clamans exspiravit,
Hasta latus perforatur,
Et sic Iesus consummatur.