52. De Passione Domini.

1. O pugna mirabilis,

o tropaeum dignum,
Agnus lupum perimit,

innocens malignum,
Qui per lignum vicerat

victus est per lignum,
Quod est terror hostium,

quod est vitae signum.

2. Infirmatur medicus,

ut sanet aegrotum,
Nec per quinque porticus

nec per aquae motum,
Sed in vase figuli

et in parte totum
Proximo parieti

copulat remotum.

3. Incipit in saeculo

factor saeculorum,
Vitae panis esurit,

sitit fons hortorum,
Noctis somno clauditur

oculus caecorum,
Plebis fit abiectio

Deus angelorum.

4. Sol in nube tegitur,

dies obscuratur,
Trepidat securitas,

virtus infirmatur,
Disciplina caeditur,

salus vulneratur,
Vita crucifigitur,

ordo conturbatur.
5. De fraternis manibus

Abel est occisus,
Quod oblatus puer est,

cuius nomen risus,
Demissus in puteum

fratribus invisus,
Quod ascendens in Bethel

calvus est irrisus;
6. Quod in agno mystico

mors est Pharaonis,
Quod saliva defluit

patri Salomonis,
Quod intravit Daniel

lacum Babylonis,
Totum est mysterium

Christi passionis.