53. Oratio bona et devota de passione Domini.

Rex, cui personae tres sunt, pari(li) devotione
Te precor, impone sensum mihi cum ratione,
Ut vigili cura tibi scribam menteque pura,
Quae contra iura tolerasti noxia dura.

5. Me scio non dignum tibi pangere thema benignum,
Quomodo per lignum superasti quodque malignum
Tempus, devotum sed agat mihi cor fore notum,
Inde, quod est votum, mihi dare nescio totum.
Solus regnavit Deus, omnia quando creavit,

10. Post sex pausavit ferias, quibus illa patravit,
Adae primatum tribuit super omne creatum.
Perdidit immo statum pomum gustando negatum.
Hoc pomum fiebant, ab Eva quotquot veniebant,
Nam descendebant Orco, nece quando ruebant.

15. Quaeque creatura, veniens Adae genitura,
Pomi censura fuit inferno peritura.
Tunc incarnatum Deus egit virgine natum,
Adae peccatura foret ut per eum vacuatum.
Missum de caelis concepit virgo fidelis

20. Sub carnis velis, parens dicto Gabrielis.

Est Deus ergo pater, virgo sine crimine mater,
Est noster frater, per quem teritur Satan ater.
Corpore crescebat, summa virtute vigebat,
Templis pergebat, gentes exempla docebat,

25. Mendicos pavit, miracula multiplicavit,
Caecos sanavit, claudis gressum reparavit.
Fit famulus fictus Iudas Schariot maledictus,
Venditus, afflictus quo rex fuit hic benedictus.
Heu, quam vile forum de domino fit dominorum,

30. Quem ter denorum vendebat denariorum.
Mane fuit pensus Pilato praeside census,
Membratim tensus, fixus clavis, cruce pensus,
Cum zona finivit, ad tartara spiritus ivit,
Luciferum trivit, vinctos solvendo redivit.

35. Morte die terna surrexit dote superna,

Regna per aeterna residens in sede paterna.
Calvariae monte rex tot mala tolerans sponte,
Erue de fonte cunctos famulos Acheronte,
Ut benedicentes tibi simus ubique placentes,

40. Tecum gaudentes et caelica regna tenentes.

Det veniae munus Albertoque trinus et unus.