54. De Passione Christi.

1. Tarda gressum, o peccator,
Vide poenam, quam salvator

Gravem pro te patitur,
Caeli terraeque creator
Et immensus conservator

In cruce suspenditur.

2. Leva vultum et intende
Et non eius parvipende

Tam dira supplicia,
Euntem sed repende
Et te compati ostende

Cordis cum maestitia.

3. O mens plus quam lapis dura,
Quare non est tibi cura

De tanta clementia?
Qui de sinu patris venit
Et te miserum redemit

Mortis violentia.
4. Lacrimas quis contineret,
Sic tractatum dum videret

Huius corpus inclitum ?
Cor lapideum haberet,
Die nocte si non fleret

Esum pomi vetitum.
5. Nusquam dolor repetitur
Tam immensus nec sentitur,

Ut iste sustinuit,
Ieremias nam in threnis
Sic de redemptoris poenis

Prophetizans cecinit:
6. O vos omnes, qui transitis
Per viam, quicunque sitis,

Precor vos, intendite,
Si est dolor sicut meus,
Homo sum et verus Deus

Pariter, attendite.

7. O quam magnum caritatis,
Amoris et pietatis

Hoc fuit indicium,
Quod de sede maiestatis
Pater nobis captivatis

Misit suum filium,
8. Ut a morte nos aeterna
Descendendo ad inferna

Libere redimeret
Gaudiumque, quod parentes
Perdiderunt delinquentes,

Nobis restitueret.

9. O peccator, ne desperes,
Quia eius es coheres,

Si tu paenitueris,
Te recipere paratum
Videbis, si cernis statum

Sui sacri corporis.

10. Latus retinet apertum,

Quod te reddat inde certum,

Quod te corde diligit;
Brachia tenet extensa,
Ecce, caritas immensa

Te amplecti satagit.

11. Caput habet inclinatum,
Se monstrat esse paratum

Dare pacis osculum,
Manus habet aptas ad dandum
Et ad tecum convivandum

Praebens tibi ferculum.

12. Totum corpus incurvatur
Ut se tibi largiatur,

Si vis illum tollere.
Bone Iesu, quis iam plura,
Per quem modum, per quae
iura

A te potest petere?
Sunanitis fit secura,
Fit purgata et fit pura

Te posse recipere.

13. Nunc rogamus Deum patrem,
Qui et nobis talem fratrem

Ab aeterno genuit,
Qui pro nobis redimendis
Et ad vitam perducendis

Tot poenas sustinuit,

14. Nos ne exhereditare

Velit, sed ad patrem dare

In caeli palatia,
Ut cum Christo coheredes
Possimus habere sedes

In aeterna gloria.