55. De Passione Domini.

1. Plange, fidelis anima,
Amica crucis intima,
Cerne Iesu gravissima
Tormenta crudelissima.

2. Geme, dole, paupercula
Crucifixi discipula,
Plange nimis et eiula
Christi tormenta singula.

3. Cerne Iesu convicia,
Et valida supplicia,
Inter ipsius brachia
Quaere tua solacia.

4. Attende caput inclitum,
Caesum et sputis illitum,
Pro te flagellis subditum,
Morti crucis expositum.

5. Iesum plagatum videas
Et cum dolente doleas,
Ibi cor tuum habeas,
Ut in aeternum gaudeas.

6. Ad crucifixum propera,
Cerne clavos et vulnera,
Nervos tensos et viscera,
Venas, ossa conumera.

7. Plange membra pendentia,
In cruce tam dolentia,
Pro te poenas ferentia
In tanta patientia.

8. Attende Dei filium,
In cruce tam propitium,
Fudit cruorem proprium
Nec timuit opprobrium.

9. Attende rivos sanguinis,
Quem fudit proles virginis,
Iesus, fons veri luminis,
Dulcis amator hominis.

10. Plange pedes amabiles,
Fossos, in cruce stabiles,
Et manus venerabiles
Iesu desiderabiles.

11. Pedum fixuras aspice
Et manuum non modice,
Te crucifixo adice
Bibens eodem calice.

12. Plange latus dominicum
Crucifixi mirificum,
Pro te passum non modicum
Fudit rorem salvificum.

13. Si crucifixum sequeris,
Cur sibi non compateris?
Surge cito, ne steteris,
Curras ad plagam lateris.

14. Ibi latens abscondere,
Si vis mortem evadere,
Ut possis hostem vincere
Et in aeternum vivere.

15. In tam venerabilibus
Crucifixi vulneribus
Stude tibi pro viribus,
Si vis frui caelestibus.

16. Attende Christum nobilem,
Crucifixum mirabilem,
Stantem in cruce flebilem,
Quasi leproso similem.

17. Cerne vultum et oculos
Et lacrimarum rivulos,
Si vis ferre manipulos
Et thesaurorum cumulos.

18. Vide linguam totaliter
Amarizatam graviter,
Quam teneas memoriter
Et secum dole pariter.

19. Tu crucifixo iungere
Et intime compatere,
Quasi pendenti loquere
Et verbis istis utere:

20. Dulcis Iesu, cur moreris
Pro reprobis et miseris?
Quod tu in cruce pateris,
Totum fuit pro ceteris.

21. Cur pendes in patibulo
Tanti amoris stimulo,
Mortis percussus iaculo
Pro redimendo populo?

22. Cur es in cruce sitiens
Et tam despecte moriens,
Iesu, fons indeficiens,
Qui es perfectus orieus?

23. Iesu, vita dulcissima,
Lux aniraae clarissima,
Car in cruce vilissima
Peris morte turpissima?

24. Quod pateris, nos fecimus,
Quod bibis, nos infodimus,
Tu rex innocentissimus,
Nos sumus, qui peccavimus.

25. O tu, qui audis talia
Facta tam triumphalia,
Pone crucis magnalia
Ad cordis penetralia.

26. In cruce sit cor sapidum,
Cruore quasi madidum,
In crucifixo validum,
Crucis amore languidum.

27. Intende spiritalibus
Beatae crucis laudibus,
Si vis a mundi nexibus
Esse liber et pestibus.

28. Sanctae crucis memoria,
Qua fugiunt daemonia,
Sit tibi pro victoria,
Qua mala cessant omnia.

29. Ad hoc crucis patibulum
Converte mentis oculum,
Sanctae crucis signaculum
Sit tibi velut speculum.

30. Dulcis Iesu, quem sitio,
Praesta mihi, quod cupio,
Ut sanctae crucis nimio
Me pascas desiderio.

31. Fac mihi delectabile
Crucis signum mirabile,
Tam dulce, tam amabile,
Quod sit inenarrabile.

32. Fac, ut in cruce gaudeam,
Crucis amore langueam
Nec satiari valeam,
Donec in carne maneam.

33. Fac, ut nunquam praeteream
Crucem,clavos et lanceam,
Sputum, coronam spineam,
Vestem quoque purpuream.

34. In his mihi satietas
Et dulcor et ebrietas,
Mei cordis satietas
Sit crucifixi pietas.

35. Precorque unigenitum
Caeli regemque inclitum,
Meum post vitae exitum
Ut suscipiat spiritum.