61. Ad Faciem Domini.

1. Ave, florens vultus Christi,
Sputa pro me suscepisti,

O decora facies,
Rogo, ut non avertaris
A me, sed intuearis

Centies et milies.

2. Ave, caput inclinatum,
Despective coronatum

Spinis infidelium,
Plagis multis perforatum
Circumquaque cruentatum,

Exemplar humilium.

3. Ave, Christe, dulcis frater,
Qui nos lactas velut mater

Corporis vulneribus,
Nobis lac tu produxisti,
Quando sanguinem fudisti
De palmis et de pedibus.

4. Ave, qui plantationem
Per tuam oblationem

Pro me patri exhibes,
Cruce, clavis et cruore,
Spinis, lancea, livore

Eius iram cohibes.

5. Ave, Christe, qui dormisti,
Soporatum suscepisti,

Tibi laus et gloria,
Culpam dele passione,
Tua resurrectione

Confer vitae gaudia.

6. Ave, Iesu, qui solamen
Reis praebes et iuvamen

Relaxando vitia
Et regnando das renatis,
A reatu expurgatis

In perennem gloriam.