63. Ad Faciem Domini.

1. Ave, facies Iesu Dei,
In te salus nostrae spei,
Te optamus, licet rei,
Perfrui in gloria.
2. Ave, facies illustrata,
Sudore sanguinis rigata,
Sputis nimis deturpata
Magna ex malitia.
3. Ave, facies gratiosa,
Super solem speciosa,
Anxietate tenebrosa
Et cruore livida.

4. Ave, facies benedicta,
Nostra tamen ob delicta
Alapis caesa et adflicta
Ac lacrimis madida.
5. Ave, facies praeclara,

Quae pro nobis in crucis ara
Morte tandem ex amara
Es effecta pallida.
6. Haec cordi meo sit impressa
Per te, Iesu, neque cessa
Hoc cremare indefessa
Tui amoris facula.

7. Ut contemplari possim satis
Post hanc vitam cum beatis
Vultum tuae deitatis
In sempiterna saecula.