65. Salutatio ad Faciem Domini.

O regalis faciei
Forma, summa nostrae spei,
Ave, salve, quae consputa
Es pro nobis et polluta,
5. A malignis caedi iussa,
Alapata et percussa,
Foeda, sordens, maculosa,
Quamvis multum sis formosa,
Multum pulchra et decora,

10. Sic, quod gliscunt omni hora
Caeli cives te spectari,
De te quoque satiari)
Quorum merces et corona
Cum sis, eia, nobis dona

15. Dona tuae pietatis,
Et cum ipsis claritatis

Tuae visu perfruamur,
Qui te modo veneramur.
Lumen vultus tui signa

20. Super nos, o tu benigna,
O iucunda et amoena
Facies, decore plena,
Nos dignando illustrare,
Sic quod post hanc vitam clare

25. Te cernamus in caelorum
Regno socii eorum,
Qui te semper speculantur,
Laudant, in te gloriantur.
Quo, tu, Iesu, splendor patris,

30. Unice Mariae matris,
A beatis adorans,
Vivis, regnas, gloriaris

Per aeterna et immortalia
Saecula saeculorum.