70. De Vulneribus Christi.

1. Ave, fructus o Mariae
Et caelestis vas sophiae,
Circumcisus qui in die,
Fac nos salvos, Iesu pie.

2. Ave, cuncta qui creasti,
Dum in monte qui sudasti,
Quando patrem exorasti,
Nos exaudi, quos plasmasti.

3. Ave, caput Christi gratum,
Duris spinis coronatum,
Nos conserva, ne peccatum
Poenae ducat ad reatum.

4. Ave, dextra manus Christi,
Perforata plaga tristi,
Nos ad dextram iube sisti,
Quos per dextram redemisti.

5. Ave, palma Iesu laeva,
Sic confixa plaga saeva,
Nos ab aevo malo leva,
Quod produxit mater Eva.

6. Ave, latus lanceatum,
Unde fluxit flumen gratum,
Praebe nobis conducatum
Ad aeternac vitae statum.

7. Ave, vulnus dextri pedis,
Aedem mentis pie laedis,
Dum ad eam saepe redis,
Esto nobis spes mercedis.

8. Ave, plaga laevae plantae,
Qua virtutum crescunt plantae,
Nos ab hoste supplantante
Contuere post et ante.

9. Ave, tota denudata
Caro Christi flagellata,
Nos conserva, ne peccata
Vita privent nos beata.
10. Ave, Iesu, cruce pressus,
Fatigatus, lassus, fessus,
Tu pro nobis post excessus
Laxa malos cordis gressus.

11. Ave, Iesu, tu frumentum,
In Maria quod inventum,
Crucis venit ad tormentum,
Cordis nostri paseementum.

12. Ergo nostri miserere,
Hic nos pasce et tuere,
Tu nos bona fac videre,
Ubi dies, quies vere.