73. De Cruce Domini.

1. Peccatores, quare desperatis,
Quantiscunque subditi peccatis?
Cernite thesaurum pietatis
In Cruce.

2. Grandi vobis debito ligatis,
Si non habetis, unde solvatis,
Optimum thesaurum concernatis
In cruce.

3. Culpis infinitae quantitatis,
Immo cunctis culpis adgregatis
Divus sanguis fortior est satis
In cruce.

4. Ibi pendet munus caritatis,
Ibi victimatur pro peccatis,
Qui libertatem cunctis dat gratis
In cruce.

5. O signanda pectore memoria,
O praeclara Domini victoria,
Purgat mundum virtus purgatoria
In cruce.

6. Expurgatur vetus Adae scoria,
Cedit limus, aperitur gloria,
Declaratur virtus amatoria
In cruce.

7. Ibi est abscissa fortitudo,
Ibi livefacta pulchritudo,
Ibi se diffundit plenitudo
In cruce.

8. Ergo si sit culpae magnitudo,
Sola mentis assit paenitudo,
Vincet pietatis multitudo
In cruce.

9. Surge, surge, qui dormis, propera
Dei crucifixi lambe vulnera,
Sibi derelinque tua scelera
In cruce.

10. Christe, qui tulisti lenis aspera,
Crucifige nostrae carnis opera,
Nostra mala dele, tolle, supera
In cruce.