75. De. sancta Cruce.

1. Ave, sanctae crucis signum,
Quod fuisti ferre dignum

Salvatorem omnium,
Cuius triumphale signum
Excludat [ab]hinc malignum,
Debellatum per benignum
Iesum Christum Dominum.

2. Arbor dedit mortis luctus,
Arbor crucis vitae fructus,
In te prorsus est confractum
Sempiternae mortis pactum,
Quo se homo obligavit,
Cum praeceptum violavit.

3. Per te homo renovatur
Et Deo reconciliatur,
Dum extensus in te Deus
Morti datur velut reus.

4. In te Christus nos redemit,
In te mortem mors peremit
Et vires hosti ademit,
Unde iam se victum gemit.

5. Ergo, Christe, splendor patris
Et pro nobis fili matris,
Assit nobis hoc munimen
Et depellat omne crimen.

6. Per hoc signum terreantur,
Qui nos semper infestantur,
Ut confusi cruci cedant,
Ne nos prava fraude laedant.