77. De sancta Cruce metra.

Quam venerabilis, impretiabilis, hic ades, o crux,
Arbor amabilis, insuperabilis, hic ades, o dux!
Cuncta poli, maris atque soli bona sola tulisti,
Crimina contere, gaudia congere, baiula Christi.
5. Ad tua cornua pectora carnea mors trahe mortis,
Ad sacra stigmata contrahe climata quattuor orbis.
Tu sine sordibus influe cordibus, o patris agne,
Crux lita postibus est pavor hostibus, o leo magne.
Hinc procul hinc, leo trux, nihil hic nisi crux, nisi pax, lux.
10. Vivat homo, foris inque domo viget unica spes crux.
Vasa Dei titulum fidei fuge, letifer anguis.
Nos foveat, mala dimoveat sacer in cruce sanguis.